Read Кыргыз тилиндеги Библия, 2004 Забур 38 Bible Online

Забур 38 - Кыргыз тилиндеги Библия, 2004 bible

Забур 38

¹Ырчылар тобунун башчысы Жедутунга. Дөөттүн забуру.

²«Тилим менен күнөөгө батпаш үчүн, өз жолдорумду байкап жүрөйүн. Кудайсыз жанымда турганда, оозумду ооздуктайын», – дедим.

³Мен дүлөй да, дудук да болдум, жакшылык жөнүндө да ооз ачпас болдум; азабым артты.

⁴Көөдөнүмдө жүрөгүм жалындап, оюмда от чыкты. Тилим ошондо сүйлөй баштады:

⁵айтчы, Теңирим, мен качан өлөм, канча күнүм калды, канча күнүм калганын, канча жашарымды билейин.

⁶Сен мага бир сөөм өмүр бердиң, менин өмүрүм Сенин алдыңда эч нерсе эмес. Чын эле, ар бир адамдын жашоосу курулай убаракерчилик экен.

⁷Чын эле, адам элес сыяктуу жүрөт, бекер түйшүк тартат, дүнүйө жыйнайт, анысы кимге каларын билбейт.

⁸Мен эми эмнени күтмөк элем, Теңир? Менин үмүтүм бир Өзүңдө.

⁹Мени мыйзамсыз иштеримдин баарынан куткар, мени акылсыздарга кордотпо.

¹⁰Мен дудук болуп калдым, ооз ачпайм, анткени Сен ушундай кылдың.

¹¹Соккуларыңды токтот, Сенин колуңдун соккусунан мен жок болуп бара жатам.

¹²Сен адамды күнөөсү үчүн жазалап, башына кыйынчылык саласың, анын көркү күбө жегендей күбүлөт. Ар бир адамдын жашоосу – курулай убаракерчилик!

¹³Менин сыйынуумду ук, Теңир, Менин ыйыма кулак сал. Менин көз жашымды көрүп унчукпай койбо. Анткени мен Сенин жолоочуңмун, өзүмдүн ата-бабаларымдай эле келгинмин.

¹⁴Мени кыйнаба, көзүм жумулуп дүйнөдөн өткүчө, күчкө толуп алайын.