Read Кыргыз тилиндеги Библия, 2004 Забур 40 Bible Online

Забур 40 - Кыргыз тилиндеги Библия, 2004 bible

Забур 40

¹Ырчылар тобунун башчысына. Дөөттүн забуру.

²Бей-бечараны ойлогон адам бактылуу! Кыйынчылык күнү аны Теңир куткарат.

³Теңир аны коргоп, өмүрүн сактап калат. Жер үстүндө ал бактылуу болот. Теңир, Сен аны душмандын колуна салып бербейсиң.

⁴Ал ооруп жатканда, Теңир ага күч берет. Сен аны төшөгүнөн тургузасың, дартынан арылтасың.

⁵«Теңир! Мага ырайым кыл, жанымды сакайт, анткени мен Сенин алдыңда күнөө кылдым», – дедим.

⁶Душмандарым мен жөнүндө «Ал качан өлөт? Анын ысымы качан өчөт?» деген жаман сөздөрдү айтышат.

⁷Мени көргөнү келген адам жалган сүйлөйт. Жүрөгүнөн жалганды ойлоп чыгарат да, сыртка чыгары менен элге жаят.

⁸Мени жек көргөндөрдүн бардыгы мага каршы чыгып, өз ара шыбырашып, мага жамандык ойлошот:

⁹«Ал айыкпас дартка чалдыкты. Ал жыгылды, эми турбайт».

¹⁰Атүгүл, мени менен тынчтыкта болгон, мен ишенип жүргөн, менин нанымды жеген адам мага согончогун көтөрдү.

¹¹Сен болсо, Теңир, мага ырайым кыл, мени тургуз, мен алардын жазасын берем.

¹²Эгерде душманым мага үстөмдүк кыла албаса, ошондон Сенин мага ырайым кылганыңды билем.

¹³Мени болсо аман сактап, Өзүңдүн алдыңа түбөлүк тургузасың.

¹⁴Теңир, Ысрайыл Кудайы, кылымдан кылымга даңкталсын! Оомийин, оомийин!