Read Кыргыз тилиндеги Библия, 2004 Забур 45 Bible Online

Забур 45 - Кыргыз тилиндеги Библия, 2004 bible

Забур 45

¹Ырчылар тобунун башчысына. Корактын уулдарыныкы. Аламот күү аспабы менен. Ыр.

²Кудай биздин баш калкалар жайыбыз жана күчүбүз, кыйынчылык учурунда тез жардам берүүчүбүз.

³Ошондуктан жер титиресе да, тоолор жылып деңизге чөксө да, биз коркпойбуз.

⁴Алардын суулары шаркырап ташкындай берсин, алардын толкундарынан тоолор титирей берсин.

⁵Дарыя суулары Кудайдын шаарын, бардыгынан жогору турган Кудайдын ыйык жайын шаттыкка бөлөйт.

⁶Кудай анын ортосунда, ал солк этпейт: Кудай ага таң азандан жардам берет.

⁷Бутпарас элдер чуулдап, падышачылыктар кулай баштады: бардыгынан жогору турган Кудай үн салды эле, жер эрип кетти.

⁸Себайот Теңир биз менен, Жакыптын Кудайы биздин чебибиз.

⁹Келгиле, Теңирдин иштерин – жер үстүн кандай кыйратканын көргүлө.

¹⁰Ал жер жүзүндөгү согуштарды токтотту, жааларды талкалады, найзаларды сындырды, арабаларды өрттөп жиберди.

¹¹Токтогула, Менин Кудай экенимди таанып билгиле. Мен элдер арасында даңкталам, жер үстүндө даңазаланам.

¹²Себайот Теңир биз менен, Жакыптын Кудайы биздин чебибиз.