Read Кыргыз тилиндеги Библия, 2004 Забур 47 Bible Online

Забур 47 - Кыргыз тилиндеги Библия, 2004 bible

Забур 47

¹Ыр. Забур. Корактын уулдарыныкы.

²Теңир биздин Кудайыбыздын шаарында, Өзүнүн ыйык тоосунда улуу, түбөлүк даңктоого татыктуу.

³Сион тоосу – эң сонун бийиктик, бүт жер жүзүнүн кубанычы. Анын түндүк тарабында улуу Падышанын шаары жайгашкан.

⁴Кудай анын сарайларында тирек катары белгилүү.

⁵Падышалардын баары чогулуп, согушка аттанышты.

⁶Бирок алар бул шаарды көргөндө, коркуп кетишти, үрөйлөрү учуп, артка качышты.

⁷Аларды коркунуч каптады, толгоо тарткан аялдай кыйналышты.

⁸Сен чыгыш шамалы менен Таршыш кемелерин кыйраттың.

⁹Биз Себайот Теңирдин шаарында, биздин Кудайдын шаарында, эмнени уксак, азыр ошону көрдүк. Кудай аны түбөлүккө бекемдейт.

¹⁰Кудай, биз Сенин ийбадатканаңдын ичинде Сенин ырайымың жөнүндө ойлондук.

¹¹Кудай, Сенин ысымың сыяктуу эле даңкың да төгөрөктүн төрт бурчуна жетет. Сенин оң колуң адилеттикке толгон.

¹²Сион тоосу шаттансын, Теңир, туура өкүмдөрүң үчүн Жүйүт кыздары кубанышсын.

¹³Сион тоосун тегеректеп, аны айланып чыккыла. Анын мунараларын санап чыккыла.

¹⁴Өз жүрөгүңөрдү анын чептерине бургула. Келечек муунга айтып бериш үчүн, анын үй-жайларын карап чыккыла.

¹⁵Анткени бул Кудай биздин түбөлүк Кудайыбыз. Ал биз өлгөнгө чейин да жол башчыбыз болот.