Read Кыргыз тилиндеги Библия, 2004 Забур 49 Bible Online

Забур 49 - Кыргыз тилиндеги Библия, 2004 bible

Забур 49

¹Асаптын забуру. Кудайлардын Кудайы, Теңир, үн салып, күн чыгыштан күн батышка чейин жер жүзүндөгүлөрдүн бардыгын чакырат.

²Кудай сулуулуктун туу чокусу болгон Сион тоосунан келет.

³Кудайыбыз келе жатат, Ал унчукпай келе жаткан жок: Анын алдында – баарын жалмаган от, тегерегинде – катуу бороон.

⁴Ал Өз элин соттоо үчүн, жогорудан асман менен жерге чакырык салып жатат:

⁵«Курмандыктын жанында Мени менен келишим түзгөн Менин ыйыктарымды чогулткула».

⁶Асман Анын чындыгын жар салып жатат, анткени бул Сот – Кудай Өзү.

⁷«Элим, Мени ук, Мен сүйлөйм, Ысрайыл, Мен сага каршы күбөгө өтөм. Мен Кудаймын, сенин Кудайыңмын.

⁸Мен сени курмандыктарың үчүн жемелебейм. Сенин бүтүндөй өрттөлүүчү курмандыктарың дайыма Менин алдымда.

⁹Сенин үйүңдөн букачар да албайм, сенин корооңдон теке да албайм.

¹⁰Анткени токойдогу жаныбарлардын баары Меники, тоодогу миңдеген мал да Меники.

¹¹Тоодогу бардык куштарды билем, талаадагы жаныбарлар Менин алдымда.

¹²Эгерде Мен ачка болсом да, сага айтмак эмесмин, анткени бүткүл аалам жана анда жашагандардын баары Меники.

¹³Мен букачардын этин жемек белем? Текенин канын ичмек белем?

¹⁴Кудайга мактоо курмандыгын алып кел, кудуреттүү Кудайга берген убадаларыңды аткар.

¹⁵Башыңа кыйынчылык түшкөн күнү Мени чакыр, Мен сени куткарам, сен болсо Мени даңктайсың».

¹⁶Күнөөкөргө болсо Кудай мындай дейт: «Эмне үчүн сен Менин мыйзамдарымды жар саласың, осуятымды оозуңа аласың?

¹⁷Сен Менин мыйзамдарымды жек көрөсүң, Менин сөздөрүмдү таштап салдың.

¹⁸Ууруну көргөндө, ага кошулуп кетесиң, ойноштук кылгандарга кошулуп ойноштук кыласың.

¹⁹Оозуңдан жаман сөздөр чыгат, тилиң болсо жалган сөздөрдү куюлуштуруп сүйлөйт.

²⁰Отуруп алып бир тууганыңа каршы сүйлөйсүң, өз энеңдин уулун жамандайсың.

²¹Сен ушундай кылдың, бирок Мен унчуккан жокмун. Өзүң кандай болсоң, Мени да ошондой ойлодуң. Айыбыңды ачып, күнөөңдү өз көзүңө көрсөтөм.

²²Кудайды унуткандар, мына ушуну түшүнгүлө, болбосо Мен силерди тытып жок кылгым келсе, эч ким куткарбайт.

²³Мага мактоо курмандыгын алып келген адам – Мага урмат көрсөткөн адам. Өз жолун байкап жүргөн адамга Мен Кудайдын куткаруусун көрсөтөм».