Read Кыргыз тилиндеги Библия, 2004 Забур 50 Bible Online

Забур 50 - Кыргыз тилиндеги Библия, 2004 bible

Забур 50

¹Ырчылар тобунун башчысына.

²Дөөт Бат-Шебага жакындагандан кийин, ага Натан пайгамбар келгендеги Дөөттүн забуру.

³Кудайым, мени Өзүңдүн улуу ырайымың боюнча ая, Өзүңдүн улуу кайрымдуулугуң боюнча күнөөлөрүмдү өчүрүп сал.

⁴Күнөөлөрүмдү тазаргыча жууп, кылмышымдан тазала.

⁵Анткени мен күнөөлөрүмдү мойнума алам, кылмышым көз алдымдан кетпейт.

⁶Мен Сага, бир гана Сага каршы күнөө кылдым, Сенин көз алдыңда жаман иш кылдым. Сенин өкүмүң адилет, Сенин сотуң таза.

⁷Мен бойго бүткөндөн тартып эле күнөөкөрмүн, энемден күнөөкөр болуп төрөлгөм.

⁸Сен жүрөктөгү чындыкты сүйөсүң, ички дүйнөмө акыл бердиң.

⁹Мага иссоп менен кан чач, ошондо таза болом. Мени жуу, ошондо кардан ак болом.

¹⁰Мага кубаныч менен шаттыктын үнүн угуз, ошондо Сен талкалаган сөөктөрүм сүйүнөт.

¹¹Күнөөлөрүмдөн жүзүңдү бур, менин кылмыштарымдын баарын өчүр.

¹²Кудайым, таза жүрөк жарат, рухумду жаңыла.

¹³Менден жүзүңдү бурба, менден Өзүңдүн Ыйык Рухуңду алба.

¹⁴Мага Өзүңдүн куткаруу кубанычыңды кайтарып бер, бийлиги бар Рухуң менен мени бекемде.

¹⁵Мыйзамсыздарга Сенин жолуңду үйрөтөм, ошондо кудайсыздар Сага кайрылышат.

¹⁶Кудайым, куткаруучу Кудайым, мени кандан куткар, менин тилим Сенин адилеттигиңди даңазалайт.

¹⁷Теңир! Менин оозумду ач, ошондо менин оозум Сенин даңкыңды жар салат.

¹⁸Анткени Сен курмандыкты каалабайсың, мен аны берер элем. Бүтүндөй өрттөлүүчү курмандыкты жактырбайсың.

¹⁹Чын жүрөктөн өкүнүү – Кудай алдында курмандык. Сен өкүнүп, моюн сунган жүрөктү жек көрбөйсүң.

²⁰Өз ырайымың менен Сионго ырайым кыл. Иерусалим дубалдарын кайра тургуз.

²¹Ошондо адилеттик курмандыктары, тартуулар, бүтүндөй өрттөлүүчү курмандыктар Сага жагымдуу болот. Ошондо Сенин курмандык чалынуучу жайыңда букачарларды курмандыкка чалышат.