Read Кыргыз тилиндеги Библия, 2004 Забур 54 Bible Online

Забур 54 - Кыргыз тилиндеги Библия, 2004 bible

Забур 54

¹Ырчылар тобунун башчысына. Кыл аспаптар менен. Дөөттүн үйрөтүүсү.

²Оо Кудай, менин сыйынуумду ук, менин жалбарган үнүмдү укпай койбо.

³Мени тыңша, мага кулак сал. Кайгыдан кыйналып онтоп жатам,

⁴душмандын үнүнөн, кудайсыздын кысымынан коркуп жатам. Анткени алар мага каршы мыйзамсыз иштерди жасап жатышат, каарданып, кастык кылып жатышат.

⁵Жүрөгүм титиреп жатат, мени өлүм коркунучу каптады.

⁶Мени коркунуч менен калтырак басты, үрөйдү учурган коркунуч каптады.

⁷Ошондо мен мындай дедим: «Ким мага көгүчкөндүкүндөй канат берет? Мен учуп чыгып, тынч алар элем.

⁸Алыска учуп кетип, ээн чөлдө жашар элем.

⁹Куюндан, бороондон жашынганга шашылар элем».

¹⁰Теңир, аларды талкала, аларды ар кандай тилдерге бөл, анткени мен шаарда болуп жаткан зордук-зомбулукту, чыр-чатакты көрүп жатам.

¹¹Алар күн-түн дебей, шаар дубалдарын айланып жүрүшөт. Шаар ичинде – кыянатчылык менен кыйынчылык.

¹²Анын дал ортосунда – бүлгүн-чапкын. Шаардын көчөлөрүнөн алдамчылык менен эки жүздүүлүк кетпейт.

¹³Анткени мени шылдыңдап жаткан адам душманым эмес, аны мен көтөрмөкмүн. Мага менменсинип жаткан адам мени жек көргөн адам эмес, андан мен качып кутулмакмын:

¹⁴бирок ошол сенсиң, жандай көргөн досум, жакын адамым.

¹⁵Сен экөөбүз чын жүрөктөн сырдашчу элек, Кудайдын үйүнө бирге барчу элек.

¹⁶Алардын түбүнө өлүм жетсин, алар өлгөндөр жаткан жайга тирүүлөй түшсүн, анткени алардын үйүндө, алардын арасында кыянаттык бар.

¹⁷Ал эми мен Кудайды чакырам, ошондо Теңир мени куткарат.

¹⁸Эртең менен да, түштө да, кечинде да жалынып жалбарам, ошондо Ал менин үнүмдү угат.

¹⁹Ким менин жанымды мага каршы чыккандардан тынчтык менен куткарат, анткени мага каршылар көп.

²⁰Кылымдардан бери тактыда отурган Кудай угуп, аларды моюн сундурат, анткени аларда эч өзгөрүү жок, алар Кудайдан коркушпайт.

²¹Алар өздөрү менен тынч жашагандарга кол салып, өздөрүнүн келишимин бузушту.

²²Алардын ооздору майдан да жумшак, бирок жүрөктөрүндө – кастык. Сөздөрү зайтун майынан да жумшак, бирок өздөрү – кындан суурулган кылыч.

²³Өз түйшүктөрүңдү Теңирге тапшыр, ошондо Ал сени колдойт. Ал адилеттүү адамдын олку-солку болуусуна эч качан жол бербейт.

²⁴Кудайым, Сен аларды өлүм оруна түшүрөсүң, канкорлор менен кара ниеттер өмүрүнүн жарымын да жашабайт. Ал эми мен, Теңир, Сага гана таянам.