Read Кыргыз тилиндеги Библия, 2004 Забур 56 Bible Online

Забур 56 - Кыргыз тилиндеги Библия, 2004 bible

Забур 56

¹Ырчылар тобунун башчысына. Жок кылба. Дөөттүн Шабулдан үңкүргө качып барганда жазган жазуусу.

²Ырайым кыл мага, Кудайым, ырайым кыл мага, анткени менин жаным Сага таянат, кыйынчылык артта калганга чейин Сенин канатыңа корголой турайын.

³Мага ырайым кылуучу Кудайды, бардыгынан жогору турган Кудайды, чакырып жатам.

⁴Ал асмандан жардам жиберип, мени куткарат. Мени жутам деп издеп жүргөндү уятка калтырат. Кудай Өз ырайымын жана чындыгын жиберет.

⁵Менин жаным арстандардын арасында. Мен оозунан жалындаган от чыккандардын арасында, тиштери жебе менен найза болгон, тилдери жалаңдаган кылыч болгон адамдардын арасында жатам.

⁶Кудайым, даңкың асмандан да жогору көтөрүлсүн, Сенин даңкың бүт жер үстүндө болсун!

⁷Менин бутума тузак даярдап коюшту; жаным кыйналды. Алдыма аң казышты, бирок ага өздөрү түшүп калышты.

⁸Жүрөгүм даяр, Кудайым, жүрөгүм даяр: ырдаймын да даңктаймын.

⁹Ойгон, даңкым, арфа менен гусли, ойгон! Мен эрте турам.

¹⁰Теңирим, Сени элдердин арасында даңазалайм, Сени уруулар арасында даңктап ырдайм.

¹¹Анткени Сенин ырайымың асманга чейин жетет, Сенин чындыгың булуттарга чейин жетет.

¹²Кудайым, даңкың асмандан да жогору көтөрүлсүн, Сенин даңкың бүт жер үстүндө болсун!