Read Кыргыз тилиндеги Библия, 2004 Забур 57 Bible Online

Забур 57 - Кыргыз тилиндеги Библия, 2004 bible

Забур 57

¹Ырчылар тобунун башчысына. Жок кылба. Дөөттүн жазуусу.

²Чыны менен эле, чындыкты айтып жатасыңарбы, силер, соттор; адилет соттоп жатасыңарбы, адам уулдары?

³Жүрөгүңөрдө мыйзамсыздык кылып жатасыңар, жерде колуңар менен кылган кыянат иштерди таразага коюп жатасыңар.

⁴Кудайсыздар төрөлгөндөн баштап эле түз жолдон чыгышат, энесинин курсагынан чыккандан тартып эле жалган айтып адашышат.

⁵Алардын уусу жыландын уусундай, кулагын жаап алган керең, уулуу жыландын уусундай.

⁶Ал арбоочунун сөздөрүн, эң эле мыкты арбоочунун арбоосун да укпайт.

⁷Кудай! Алардын оозундагы тиштерин талкала, арстандардын жаактарын сындыр, Теңир!

⁸Алар агын суудай агып жок болушсун, алар сынган жебелерге окшоп калышсын.

⁹Yлүлдөй болуп бараткан жеринен жок болушсун, бойдон түшкөн баладай, күндү көрбөй калышсын.

¹⁰Казаныңар күйүп жаткан тикенектин табын сезгенче, анын күйбөгөнүн да, күйгөнүн да куюн учуруп кетсин.

¹¹Кудайдын алардан өч алганын көргөндө, адил адам кубанат, буттарын кудайсыздардын канына жууйт.

¹²Ошондо адам: «Чыны менен эле, адил адам өз жемишин алат! Жер үстүндө жазалай турган Кудай бар!» – дейт.