Read Кыргыз тилиндеги Библия, 2004 Забур 58 Bible Online

Забур 58 - Кыргыз тилиндеги Библия, 2004 bible

Забур 58

¹Ырчылар тобунун башчысына. Жок кылба. Шабул Дөөттү өлтүрүү үчүн, үйүн кароолго алган учурда Дөөттүн жазган жазуусу.

²Оо Кудай! Мени душмандарымдан куткар, мага каршы чыккандардан корго!

³Мени мыйзамсыз иш кылгандардан куткар, канкорлордон сакта.

⁴Анткени, мына, алар мени өлтүргүсү келип аңдып жүрүшөт, зулумдар мага каршы топтолуп жатышат. Бул менин кылмышым үчүн эмес, менин күнөөм үчүн эмес, Теңир.

⁵Мен күнөөсүз болсом деле топтошуп, куралданып жатышат. Мага жардам берүүгө кел, назарыңды сал.

⁶Сен, Теңир, Себайот Кудайсың, Ысрайылдын Кудайысың, бардык элдерди жазалоого аттан, мыйзамсыз иш кылган кудайсыздардын бирин да аяба.

⁷Кечинде алар кайрадан келишет, иттердей улуп, шаарды тегеренип жүрүшөт.

⁸Мына, алар оозу менен жаман сөздөрдү кусуп жатышат, алардын оозунда кылычтары бар. Алар: «Ким укмак эле?» – деп ойлошот.

⁹Бирок Сен, Теңир, аларды күлкү кыласың, ал элдердин баарын уят кыласың.

¹⁰Алардын күчү бар, бирок мен Өзүңө чуркайм, анткени Кудай менин тирегим.

¹¹Мага ырайым көрсөткөн Кудай мени алдыман тосуп чыгат. Кудай мени душмандарымды коркпой карагыдай кылат.

¹²Элим унутуп калбашы үчүн, аларды өлтүрбө. Аларды Өз күчүң менен таркатып жибер, аларды кулат, Теңир, биздин калканыбыз.

¹³Алар тилдеринин күнөөсү үчүн, ооздорунан чыккан сөздөрү үчүн, өздөрүнүн текебердиги менен берген анты үчүн, айткан калпы үчүн колго түшүшсүн.

¹⁴Каарың менен чачып жибер, аларды чачып жибер, алар жок болушсун. Кудай Жакыптын үстүнөн бийлик жүргүзөрүн төгөрөктүн төрт бурчу билсин.

¹⁵Алар кечинде кайрылып келип, иттердей улуп, шаарды тегеренип жүрүшсүн.

¹⁶Тамак издеп тентип жүрүшсүн, түндөрдү ачка өткөрүшсүн.

¹⁷Мен болсо Сенин кудуретиңди мактап ырдайм, Сенин ырайымыңды таң азандан жар салам, анткени башыма кыйынчылык түшкөн күнү Сен мага тирек, баш калкалар жай болдуң.

¹⁸Менин Күчүм! Сени даңктап ырдайм, анткени Кудай менин тирегим, мага ырайым кылган Кудайым.