Read Кыргыз тилиндеги Библия, 2004 Забур 59 Bible Online

Забур 59 - Кыргыз тилиндеги Библия, 2004 bible

Забур 59

¹Ырчылар тобунун башчысына. Шушан-Эдут күү аспабы менен. Yйрөнүү үчүн Дөөттүн жазуусу.

²Дөөттүн месопотамиялык Сирия жана собалык Сирия менен согушкандагы, Жойап кайрылып келе жатып, Туздуу өрөөнүндө он эки миң эдомдукту кыйратканда жазган жазуусу.

³Оо Кудай! Сен бизди четке кактың, бизди талкаладың, бизге каардандың. Эми бизди кайра тургуз.

⁴Сен жерди титиретип, жарака кетирдиң. Анын бузулган жерлерин айыктыр, анткени ал титиреп жатат.

⁵Сен Өз элиңдин башынан оор күндөрдү өткөрүүсүнө жол бердиң, бизди баш айланта турган шарабыңа тойгуздуң.

⁶Кудайдан корккондорго тууңду бер, алар аны чындык үчүн көтөрсүн.

⁷Сенин жакшы көргөндөрүң куткарылсын. Мени Өзүңдүн оң колуң менен куткар, мени ук.

⁸Кудай Өзүнүн ыйык жайында мындай деди: «Жеңишке жетем, Шекемди бөлөм, Сукот өрөөнүн өлчөйм.

⁹Гилат да, Менаше да Меники, Эпрайым – Менин башымдагы туулга, Жүйүт Менин бийлик таягым.

¹⁰Маап Менин жууна турган чылапчыным. Эдомго өтүгүмдү сунам. Пелишти жерин жеңип, салтанат менен чыгам!»

¹¹Ким мени бекем чептүү шаарга киргизет? Ким мени Эдомго жеткирет?

¹²Кудайым, Сен бизди таштап койдуңбу? Кудайым, биздин аскерлер менен согушка чыкпайсыңбы?

¹³Бизге кысталышта жардам бер, анткени адамдын жардамы – курулай убаракерчилик.

¹⁴Кудай менен күчтүүбүз, Ал душмандарыбызды кулатат.