Read Кыргыз тилиндеги Библия, 2004 Забур 61 Bible Online

Забур 61 - Кыргыз тилиндеги Библия, 2004 bible

Забур 61

¹Жедутундуку боюнча. Ырчылар тобунун башчысына. Дөөттүн забуру.

²Менин жаным Кудайдан гана тынчтык табат. Мени Ал гана куткарат.

³Бир гана Ал менин чебим, куткаруучум, тирегим, ошондуктан мен жыгылбайм.

⁴Качанкыга чейин жалгыз адамды куугунтуктай бересиңер? Баарыңар урайын деп калган дубалга, кыйшайып калган тосмого окшоп жерге кулайсыңар.

⁵Алар аны тактыдан кулатууну ойлоп, жалаа жабышты. Алар оозу менен бата беришет, бирок жүрөгүндө каргашат.

⁶Жаным, Кудайдан гана тынчтык тап! Анткени мен бир гана Андан үмүт кылам.

⁷Бир гана Ал менин чебим, куткаруучум, тирегим, ошондуктан мен жыгылбайм.

⁸Менин куткарылуум да, даңкым да Кудай. Менин бекем чебим да, баш калкалар жайым да Кудай.

⁹Адамдар! Ар убакта Кудайдан үмүттөнгүлө. Жүрөгүңөрдөгүнү Анын алдына төккүлө, анткени Кудай биздин баш калкалар жайыбыз.

¹⁰Адам уулдары – болгону, жел; атактуу адамдар – закым. Эгерде аларды таразага тартса, баары биригип желден жеңил.

¹¹Талоончулукка таянбагыла, уурдап алганыңар менен менменсинбегиле. Байлыгыңар көбөйгөн сайын, жүрөгүңөр байлыкка байланбасын.

¹²Кудай мага бир жолу айтты, мен эки нерсени: күч Кудайда экенин,

¹³ырайым да Сенде экенин уктум, Теңир, анткени Сен ар бир адамга ишине жараша тиешелүүсүн бересиң.