Read Кыргыз тилиндеги Библия, 2004 Забур 62 Bible Online

Забур 62 - Кыргыз тилиндеги Библия, 2004 bible

Забур 62

¹Дөөттүн Жүйүт чөлүндө жүргөндөгү забуру.

²Кудай! Сен менин Кудайымсың, Сени таң сүргөндөн баштап эле издей баштайм. Менин жаным Сени эңсейт, какшыган, суусуз ээн жерде денем Сени көксөйт.

³Сенин күчүң менен даңкыңды көрүү үчүн, мен Сени ыйык жайда карадым.

⁴Анткени өмүргө караганда Сенин ырайымың артык, оозум Сени даңктайт.

⁵Сени өмүрүм өткөнчө ушинтип мактайм. Сенин ысымың үчүн колумду жогору көтөрөм.

⁶Төшөгүмдө жатып Сени эстегенде, түн ичинде Сен жөнүндө ойлогондо,

⁷менин жаным майга жана зайтун майына тойгонсуп, оозум Сени кубанычтуу үн менен даңктайт.

⁸Анткени Сен менин жардам берүүчүмсүң, мен Сенин канатыңдын далдаасында шаттанам.

⁹Жаным Сага байланды. Сенин оң колуң мени колдоп турат.

¹⁰Ал эми мени өлтүргүсү келгендер өлгөндөр жаткан жайга түшүшөт.

¹¹Аларды кылычтап өлтүрүшөт, алар чөөлөргө жем болушат.

¹²Падыша болсо Кудайдан кубаныч алат, Кудай менен ант бергендер даңкталышат, анткени жалган сүйлөгөндөрдүн жаагы жап болот.