Read Кыргыз тилиндеги Библия, 2004 Забур 64 Bible Online

Забур 64 - Кыргыз тилиндеги Библия, 2004 bible

Забур 64

¹Ырчылар тобунун башчысына. Ырдоо үчүн Дөөттүн забуру.

²Кудайым, Сиондогу даңк Сага таандык, Иерусалимде Сага убада беришет.

³Сен сыйынууну угасың, ар бир адам Сага чуркайт.

⁴Мыйзамсыз иштер мени кыйнап жатат. Кылмыштарыбызды Сен Өзүң тазалайсың.

⁵Сен тандап алган, Өзүңдүн корооңдо жашашы үчүн, Өзүңө жакындаткан адам бактылуу. Биз Сенин үйүңдүн, Сенин ыйык ийбадатканаңдын баталарына тоёбуз.

⁶Адилет сотто коркунучтуу болгон Кудай, бизге кулак сал. Биздин Куткаруучубуз, төгөрөктүн төрт бурчунун, алыскы деңиздегилердин таянычы Сенсиң.

⁷Өз күчү менен тоолорду тургузган, кудурет менен курчанган,

⁸деңиздердин шоокумун, алардын толкундарын, элдердин козголоңдорун токтоткон Сенсиң!

⁹Сенин жышаандарыңдан бүт жер жүзүндө жашагандар коркушат. Эртең менен да, кечинде да Өзүң даңкталасың.

¹⁰Жерге түшүп, анын суусунун кандырасың, аны мол түшүмгө байытасың. Сенин дарыяларың сууларга толгон, жерден дан бересиң, анткени жерди ошондой кылып жараткансың.

¹¹Анын бороздорун кандырасың, өңгүл-дөңгүл жерлерин түздөйсүң, жамгыр суусу менен жибитесиң, өсүмдүктөрүнө батаңды бересиң.

¹²Жылды берекеңе бөлөйсүң, Сен баскан жерлерден май төгүлүп турат.

¹³Чөлдөрүңөн май төгүлөт, адырлар кубанычка бөлөнүшөт.

¹⁴Жайыттар малга, өрөөндөр данга толуп, бардыгы шаттанып ырдашат.