Read Кыргыз тилиндеги Библия, 2004 Забур 65 Bible Online

Забур 65 - Кыргыз тилиндеги Библия, 2004 bible

Забур 65

¹Ырчылар тобунун башчысына. Ыр. Забур. Бүт жер жүзү, Кудайды даңазала!

²Анын ысымын даңктап ырда, Аны даңкта, макта.

³Кудайга мындай дегиле: «Сенин иштериң кандай коркунучтуу! Сенин күчүң зор, ошондуктан Сага душмандарың багынат.

⁴Бүт жер жүзү Сага таазим кылып, Сени мактап ырдасын, Сенин ысымыңды даңктап ырдасын».

⁵Келгиле, Кудайдын иштерин көргүлө, Анын адам баласына кылган иштери коркунучтуу.

⁶Ал деңизди кургактыкка айлантты. Дарыядан жөө өтүштү. Ошол жерде биз Аны менен кубанганбыз.

⁷Ал Өз кудурети менен түбөлүк бийлик жүргүзөт. Анын көздөрү элдерди карап турат, козголоңчулар көтөрүлүшпөсүн.

⁸Элдер, биздин Кудайды даңктагыла, Анын даңкын жар салгыла.

⁹Ал биздин өмүрүбүздү сактап калды, бутубуздун тайышына жол берген жок.

¹⁰Кудай, Сен бизди сынадың, бизди күмүштү эриткендей эриттиң.

¹¹Сен бизге тузак тарттың, башыбызга алаамат түшүрдүң.

¹²Адамдарды башыбызга чыгардың. Биз отко да, сууга да кирдик, анан Сен бизди азаттыкка алып чыктың.

¹³Мен Сенин үйүңө бүтүндөй өрттөлүүчү курмандыктар менен кирип, Сага берген убадаларымды аткарам.

¹⁴Алар менин башыма кыйынчылык түшкөндө, өз оозумдан чыккан, аларды мен өз тилим менен айткам.

¹⁵Кочкорлордун майларын өрттөп, мен Сага бүтүндөй өрттөлүүчү курмандык чалам, өгүздөр менен текелерди курмандыкка чалам.

¹⁶Кудайдан корккондор, баарыңар келип уккула, Ал менин жаным үчүн эмне кылгандыгын силерге жарыя кылам.

¹⁷Мен Аны өз оозум менен чакыргам, Аны өз тилим менен мактагам.

¹⁸Эгерде мен жүрөгүмдөн мыйзамсыздыкты көргөн болсом, анда Теңир мени укмак эмес.

¹⁹Бирок Кудай укту, менин жалынган үнүмө кулак салды.

²⁰Менин сыйынуумду четке какпаган, мени Өз ырайымынан ажыратпаган Кудайга алкыш!