Read Кыргыз тилиндеги Библия, 2004 Забур 68 Bible Online

Забур 68 - Кыргыз тилиндеги Библия, 2004 bible

Забур 68

¹Ырчылар тобунун башчысына. Шошаним күү аспабы менен. Дөөттүн забуру.

²Кудай, мени куткар, анткени суулар менин жаныма чейин жетти.

³Мен терең сазга батып калдым, бут коёрго жер жок. Суунун терең жерине кирдим, суунун шар агымы мени аласалдырып бара жатат.

⁴Жардам сурагандан чарчадым, тамагым да кургап калды, Кудайымды күтө берип, көзүм талыды.

⁵Мени себепсиз эле жек көргөндөр башымдагы чачымдан көп. Мени адилетсиз куугунтукка алган душмандарым күчөп кетти, мен алардын эч нерсесин тартып албасам да беришим керек экен.

⁶Оо Кудай! Сен менин акылсыздыгымды билесиң, менин күнөөм Сенден жашыруун эмес.

⁷Теңирим, Себайот Кудай, Сенден үмүт кылгандардын баары мен үчүн уят болушпасын. Ысрайыл Кудайы, Сени издегендер мен үчүн шылдың болушпасын.

⁸Анткени мен Сен үчүн жаманатты болуп жатам, бетиме көө жаап жатышат.

⁹Өз бир туугандарыма жат киши болуп калдым, өз энемдин балдарына бөтөн болуп калдым.

¹⁰Анткени Сенин үйүңө болгон кызганыч мени жеп жатат, Сага тил тийгизгендердин суук тили мага тийип жатат.

¹¹Мен ыйлап орозо кармадым. Ушул үчүн да мени жамандап тилдешет.

¹²Кийим ордуна зумбал кийсем, алар мени лакап кылып алышты.

¹³Дарбаза жанында отургандар мени кеп кылып жатышат, шарап ичип отургандар мени ырга кошуп ырдап жатышат.

¹⁴Бирок, Теңирим, мен Сага сыйынам. Кудайым, мени жакшы убакта Өзүңдүн эбегейсиз ырайымың менен, куткаруучу чындыгың менен ук!

¹⁵Чөгүп кетпейин, мени сормо саздан сууруп чык. Жек көргөндөрдөн жана терең суулардан кутулайын.

¹⁶Мени суу ташкыны агызып кетпесин, суунун ирими мени жутуп албасын, үстүмдөгү туңгуюк өзүнүн оозун жаап салбасын.

¹⁷Мага кулак сал, Теңирим, анткени Сенин ырайымың жакшы. Өзүңдүн улуу ырайымың менен мага назар сал.

¹⁸Өз кулуңдан жүзүңдү жашырба, анткени мен кайгыга малындым. Мага кечиктирбей жооп бер.

¹⁹Жаныма жакын кел, жанымды куткар. Мени душмандарым үчүн куткар.

²⁰Менин шылдың болгонумду, уят болгонумду, жаманатты болгонумду билесиң. Душмандарымдын баары Сага белгилүү.

²¹Шылдың сөздөрү жүрөгүмдү оорутту, алсырап калдым. Бирөө кайгыма ортоктош болор бекен деп күттүм, бирок андай болбоду; сооротуучуларды күттүм, бирок таба албадым.

²²Тамакка өт кошуп беришти, суусаганымда, ачуу ичимдик ичиришти.

²³Дасторкону өздөрүнө тор болсун, тынч өткөргөн тойлору өздөрүнө тузак болсун.

²⁴Алардын көздөрү караңгылап көрбөй калсын, алардын белин түбөлүккө алсырат.

²⁵Аларга каарыңды төк, аларды каарыңдын жалыны каптасын.

²⁶Yйлөрү аңгырап бош калсын, чатырларында эч ким жашабасын.

²⁷Анткени Сен жарадар кылганды алар да куугунтукка алышат. Сен жаралагандардын азаптарын арбытып жатышат.

²⁸Алардын күнөөсүнө күнөө кош, Сен аларды актаба.

²⁹Алар тирүүлөрдүн китебинен өчүрүлсүн, алардын аты адил адамдардын аттары менен бирге жазылбасын.

³⁰Мен болсо жардымын, азап тартып жатам, Кудайым, Сен мага жардам берип бекемде.

³¹Мен өз Кудайымдын ысымын даңктап ырдайм, Аны даңазалайм.

³²Бул өгүзгө караганда, мүйүздүү жана туяктуу букачарга караганда Теңирге көбүрөөк жагат.

³³Муну запкы тарткандар көрүп кубанышат. Кудайды издегендердин жүрөктөрү жанданат.

³⁴Анткени Теңир жакырларды угат, Өз туткундарын жек көрбөйт.

³⁵Аны асман менен жер, деңиз жана анда жашагандардын бардыгы даңктасын.

³⁶Анткени Кудай Сион тоосун куткарат, Жүйүт шаарларын кайра тургузат, ошондо алар ал жерлерге отурукташышат, ал жерлерди ээлеп алышат.

³⁷Анын кулдарынын укум-тукуму ал жерди мурастайт, Анын ысымын сүйгөндөр ал жерге отурукташышат.