Read Кыргыз тилиндеги Библия, 2004 Забур 7 Bible Online

Забур 7 - Кыргыз тилиндеги Библия, 2004 bible

Забур 7

¹Бенжемин тукумунан чыккан Куштун иши боюнча Дөөттүн Теңир алдында зарлаган ыры.

²Теңирим, Кудайым, мен Сага таянам. Мени куугунтукка алгандардан куткар, мени ошолордон сакта.

³Алар мени куткаруучу жок кезде арстан өңдүү тытып, жанымды сууруп алышпасын.

⁴Теңирим, Кудайым! Эгер мен бир жаман иш кылган болсом, колумда жалган иш болсо,

⁵эгер мени менен тынч жашаган адамга жамандык кылган болсом (мага эч себепсиз душман болгон адамды да куткаргам),

⁶анда мени душман кууп жетип, өмүрүмдү тебелеп, даңкымды күлгө айлантып салсын.

⁷Теңир, каарың менен ордуңан тур, душмандарымдын жаалына каршы чык; мен үчүн ойгонуп, Өз өкүмүңдү чыгар, аны Өзүң осуят кылгансың.

⁸Сенин тегерегиңе топ эл жыйылат, алардын үстүнөн жогору көтөрүл.

⁹Теңир элдерди соттойт. Теңирим, мага чынчылдыгым, күнөөсүздүгүм боюнча өкүм чыгар.

¹⁰Кудайсыздардын кыянаттыктары токтосун, адил адамга болсо күч бер, анткени Сен жүрөктөрдү, ички ойлорду сынайсың, адилеттүү Кудай!

¹¹Менин калканым – таза жүрөктөрдү куткаруучу Кудай.

¹²Кудай – адилеттүү сот, Ал – ар күнү катуу жазалоочу Кудай.

¹³Эгерде ким кайрылбаса, Ал кылычын курчутуп, жаасын мээлеп тартат.

¹⁴Ал үчүн өлтүрүүчү куралдарды даярдайт, Өзүнүн жебелерин оттуу кылат.

¹⁵Мына, кудайсыз адам жамандык сээп, куру нерсени багып, жалганды жыйнап алды.

¹⁶Бирөөгө казган оруна өзү түштү.

¹⁷Анын кылган жамандыгы өз башына көрүнөт, анын кылган кыянаттыгы төбөсүнө түшөт.

¹⁸Мен Теңирди чындыгы үчүн даңктайм, бардыгынан жогору турган Теңирдин ысымын мактап ырдайм.