Read Кыргыз тилиндеги Библия, 2004 Забур 70 Bible Online

Забур 70 - Кыргыз тилиндеги Библия, 2004 bible

Забур 70

¹Мен Сага таянам, Теңирим, түбөлүккө уятка калбайм.

²Мени Өз адилеттигиң менен куткар, мени бошот. Мага кулак сал, мени куткарып кал.

³Мен ар дайым жашына ала турган бекем чеп бол. Мени куткарууну Өзүң буйругансың, анткени Сен менин аска-зоомсуң, коргонор сепилимсиң.

⁴Оо Кудай, мени кудайсыздын, мыйзамсыздын, тоноочунун колунан куткар.

⁵Анткени Сен менин үмүтүмсүң, Теңирим, Кудайым, жаш кезимден бери Сен менин таянычымсың!

⁶Энемдин курсагында жатканымда эле Сага таянчумун. Мени энемдин курсагынан Өзүң чыгардың. Сени тынбай даңктайм.

⁷Көпчүлүк үчүн мен таң калтырарлык жан болдум, бирок Сен менин бекем үмүтүмсүң.

⁸Сенин улуулугуңду ар күнү даңазалап ырдаш үчүн, оозум мактоо ырларына толсун.

⁹Картайганымда, менден баш тартпа, алдан-күчтөн тайыганымда, мени таштап салба.

¹⁰Анткени душмандарым мага каршы сүйлөшүшөт, мени өлтүргүсү келип аңдып тургандар өз ара кеңешип жатышат.

¹¹«Кудай аны таштап салды, артынан түшүп кармап алгыла, анткени анын куткаруучусу жок», – дешет.

¹²Кудай! Менден алыстаба. Кудай! Мага тезирээк жардам бер.

¹³Мага душман болгондор уятка калып жок болушсун. Мага жамандык издегендер шылдың болуп, абийири төгүлсүн.

¹⁴Мен болсо ар дайым Сенден үмүттөнөм, Сени кайра-кайра даңктай берем.

¹⁵Менин оозум ар күнү Сенин чындыгыңды, Сенин улуу иштериңди жарыя кылат, мен аларды санай албайм.

¹⁶Теңирдин кудурети жөнүндө ойго батам. Сенин чындыгыңды, бир гана Сенин чындыгыңды эске салам.

¹⁷Оо Кудай! Мени жаш кезимден бери үйрөтүп келе жатасың, азыркыга чейин Сенин кереметтериңди жарыя кылып келе жатам.

¹⁸Кудайым, мени карыганымда да, чачым агарганда да калтырба. Сенин күчүңдү ушул тукумга, Сенин кудуретиңди келе жаткан тукумга жарыя кылганча, мени таштаба.

¹⁹Оо Кудай, адилеттигиң асманга жетет, Сен улуу иштерди жасадың. Оо Кудай, Сага ким тең келе алат?

²⁰Сен менин башыма оор кайгыны көп салдың, бирок кайрадан тирилтип алдың, жердин түбүнөн кайра чыгардың.

²¹Сен мени көтөрүп тургансың, мени сооротуп тургансың.

²²Ошондуктан мен Сени, Кудайым, Сенин чындыгыңды арфа чертип даңктайм. Гусли менен Сени мактап ырдайм, оо Ысрайылдын ыйык Кудайы!

²³Сен жөнүндө ырдап жатканда, оозум да, Өзүң куткарып алган жаным да кубанат.

²⁴Менин тилим да ар күнү Өзүңдүн чындыгыңды жарыя кылат, анткени мага жамандык издегендер уятка калышты, шылдың болушту.