Read Кыргыз тилиндеги Библия, 2004 Забур 71 Bible Online

Забур 71 - Кыргыз тилиндеги Библия, 2004 bible

Забур 71

¹Сулайманга. Оо Кудай! Падышага Өзүңдүн калыстыгыңды, падышанын уулуна Өз адилеттигиңди бер.

²Ал Сенин элиңди, жакырларыңды сотто адилет соттосун.

³Адамдарга тоолор тынчтык, адырлар чындык алып келсин.

⁴Ал элдин жакырларын туура соттосун, кедейлердин балдарын сактасын, зулумдарды тыйсын.

⁵Күн менен ай турганда, муундан муунга Кудайдан коркушсун.

⁶Ал чабылган шалбаага жааган жамгырдай жаасын, жер сугарган тамчылардай тамсын.

⁷Анын күндөрүндө адил адам гүлдөйт, асмандагы ай жок болгончо, тынчтык өкүм сүрүп турат.

⁸Ал деңизден деңизге чейинки жерди жана дарыядан жердин акырына чейинки аймактарды ээлейт.

⁹Анын алдына чөл эли жыгылып таазим кылат, анын душмандары топурак жалашат.

¹⁰Таршыш менен аралдардын падышалары ага алым беришет. Аравия жана Шеба падышалары тартууларды алып келишет.

¹¹Ага бардык падышалар таазим кылышат, бардык элдер кызмат кылышат.

¹²Анткени ал жардам сурап кыйкырып жаткан жакырды жана жардам берүүчүсү жок эзилгенди куткарат.

¹³Кедей менен жакырга ырайым кылат, байкуш кедейлердин жанын куткарат.

¹⁴Алардын жанын кара ниеттерден, зордук-зомбулуктан куткарат, анын көз алдында алардын каны кымбатка турат.

¹⁵Ал жашайт, ага Аравиянын алтындарын берип турушат, ал үчүн тынымсыз сыйынып турушат, ага ар күнү бата берип турушат.

¹⁶Жерде да, тоодо да түшүм мол болот. Анын жемиштери Лебанон токоюндай шуудурайт, шаарларда эл жердеги чөптөй көбөйөт.

¹⁷Анын ысымы түбөлүккө сакталат. Асмандагы күн жок болгончо, анын ысымы муундан муунга айтыла берет. Ал аркылуу элдер бата алышат. Бардык элдер ага алкыш айтышат.

¹⁸Кудай-Теңир, Ысрайылдын Кудайы, кереметтерди жасаган жалгыз Өзү даңктала берсин!

¹⁹Анын даңктуу ысымы даңкталсын, бүт жер жүзү Анын даңкына толсун. Оомийин, оомийин!

²⁰Жышай уулу Дөөттүн сыйынуулары бүттү.