Read Кыргыз тилиндеги Библия, 2004 Забур 72 Bible Online

Забур 72 - Кыргыз тилиндеги Библия, 2004 bible

Забур 72

¹Асаптын забуру. Кудай Ысрайылга, жүрөгү тазаларга кандай ырайымдуу!

²Менин бутум тайгаланып кете жаздады, таманым тайып кете жаздады.

³Анткени кудайсыздардын жыргал турмушун көрүп, акылсыздарга суктандым.

⁴Анткени алар өмүрүнүн аягына чейин азап тартышпайт, күч-кубаттуу.

⁵Алар башка адамдардай мээнет кылышпайт, башка адамдардай кыйынчылык көрүшпөйт.

⁶Ошондуктан алар текебердикти шурудай тагынып, зулумдукту кийимдей кийип алышкан.

⁷Семирип көздөрүн май басып калган, алардын жүрөгү ар кандай ойлорго толгон.

⁸Алар бардыгын кордошот, жалган ушак таратышат, менменсинип сүйлөшөт.

⁹Алардын ооздору асманга каршы сүйлөйт, тилдери жер үстүндө басып жүрөт.

¹⁰Ошондуктан Анын эли да аларды ээрчип, чөйчөк толо суу ичишет.

¹¹Алар: «Кудай кантип билмек эле? Бардыгынан жогору турган Кудай баарын билеби?» – дешет.

¹²Ушул кудайсыздар бул дүйнөдө жыргап, байлыктарын көбөйтүп жатышат.

¹³«Анда мен жүрөгүмдү бекер эле тазаладымбы? Колумду айыпсыздыгым менен бекер эле жуудумбу?

¹⁴Күн сайын өзүмдү бекер эле жараладымбы, күнүгө эртең менен өзүмдү бекер эле ашкереледимби?»

¹⁵Бирок: «Мен ушундай ойлойм», – десем, анда Сенин уулдарыңдын тукумунун алдында күнөөкөр болмокмун.

¹⁶Муну кандай түшүнсө болот деп ойлодум,

¹⁷бирок бул мага Кудайдын ыйык жайына киргенге чейин жана алардын акыр аягын түшүнгөнгө чейин кыйын көрүндү.

¹⁸Сен аларды тайгак жолго койгонсуң, акыры түпсүз туңгуюкка кулатасың.

¹⁹Алар күтүлбөгөн жерден бүлгүнгө учурап, коркунучтардан өлүп жок болушту!

²⁰Теңирим, Сен аларды түш көрүп жатып ойгонгондой кылып ойготосуң, ой-максаттарын талкалайсың.

²¹Жүрөгүм күйүп, ичим кайнап-бышып жатканда,

²²мен акылсыз элем, түшүнчү эмес элем; сенин алдыңда мал сыяктуу элем.

²³Бирок мен ар дайым Сени мененмин. Сен мени оң колумдан кармап турасың.

²⁴Сен мени Өз кеңешиң менен жетектеп турасың, анан мени даңкың менен кабыл аласың.

²⁵Асманда мага Сенден башка ким керек? Жерде да мага Сенден башка эч нерсенин кереги жок.

²⁶Денем да, жүрөгүм да алсырады, бирок жүрөгүмдүн жөлөгү, түбөлүк үлүшүм – Кудай.

²⁷Анткени Сенден алыстагандар өлүп жатышат; Өзүңдөн баш тарткандардын баарын Сен жок кылып жатасың.

²⁸Мага болсо Кудайга жакындаган жакшы! Кудай-Теңирди өзүмө баш калкалар жай кылдым. Сенин бардык иштериңди жарыя кылам.