Read Кыргыз тилиндеги Библия, 2004 Забур 74 Bible Online

Забур 74 - Кыргыз тилиндеги Библия, 2004 bible

Забур 74

¹Ырчылар тобунун башчысына. Жок кылба. Асаптын забуру. Ыр.

²Сени даңктайбыз, Кудай, Сени даңктайбыз, анткени Сенин ысымың бизге жакын экенин Өзүң көрсөткөн кереметтер айгинелеп турат.

³«Убакытты тандап алгандан кийин, Мен адилет сот жүргүзөм.

⁴Жер титиреп жатат, анын үстүндө жашагандар да титиреп жатышат. Мен анын түркүктөрүн бекитем».

⁵Акылсыздарга: «Акылсыздык кылбагыла», кудайсыздарга: «Мүйүзүңөрдү көтөрбөгүлө», – дейм.

⁶«Мүйүзүңөрдү бийик көтөрбөгүлө, тоң моюндук кылып сүйлөбөгүлө», – дейм.

⁷Анткени жардам батыштан да, чыгыштан да, чөлдөн да келбейт.

⁸Бирок Кудай Өзү Сот: бирин басат, экинчисин көтөрөт.

⁹Анткени чөйчөк Кудайдын колунда, анын ичинде ар кандай ачыткыга толгон шарап көбүрүп-жабырып турат, Ал ушул чөйчөктөн куюп жатат. Жада калса, анын ачыткысын жер жүзүндөгү бардык кудайсыздар калтырбай ичишет.

¹⁰Мен болсо Жакыптын Кудайын түбөлүккө жар салам, мактап ырдайм.

¹¹Бардык кудайсыздардын мүйүздөрүн сындырам, ошондо адил адамдардын мүйүздөрү көтөрүлөт.