Read Кыргыз тилиндеги Библия, 2004 Забур 76 Bible Online

Забур 76 - Кыргыз тилиндеги Библия, 2004 bible

Забур 76

¹Ырчылар тобунун башчысына. Жедутундуку боюнча. Асаптын забуру.

²Yнүм Кудайга жетсин, жардам сурап кайрылам; үнүм Кудайга жетсин, Ал мени угат.

³Башыма кыйынчылык түшкөн күнү Теңирди издейм; түн ичинде сунулган колум түшпөйт; жаным тынчтангысы келбейт.

⁴Кудайды ойлоп титиреп жатам. Ойлоно берип, рухум алсырап бара жатат.

⁵Сен мага кирпик кактырбайсың, кыйналдым, сүйлөөгө дарманым жок.

⁶Байыркы күндөр жөнүндө, өтүп кеткен жылдар жөнүндө ойлоном.

⁷Түнкүсүн ырларымды эстейм, жүрөгүм менен сырдашам, рухум менин алдыма суроо коёт:

⁸“Чын эле, Теңир биротоло баш тарттыбы, мындан ары ырайым кылбайбы?

⁹Чын эле, Анын ырайымы биротоло токтодубу, Анын убада сөзү укумдан-тукумга жетпей үзүлдүбү?

¹⁰Чын эле, Кудай ырайым кылганды унуттубу? Чын эле, Ал ачуусу менен Өзүнүн боорукерлигин токтотуп койдубу?”

¹¹Мен дагы: «Бардыгынан жогору турган Кудайдын оң колунун өзгөргөнү – менин кайгым», – дедим.

¹²Теңирдин иштерин эске салам. Сенин мурунку кереметтериңди эске салам.

¹³Сенин бардык иштериң жөнүндө ой жүгүртөм, Сенин улуу иштериң жөнүндө ойлоном.

¹⁴Кудай! Сенин жолуң ыйык. Биздин улуу Кудайдай Кудай барбы?

¹⁵Сен укмуштарды жараткан Кудайсың. Өз кудуретиңди элдердин арасында айкын көрсөттүң.

¹⁶Сен Өзүңдүн кудуреттүү күчүң менен Өз элиңди, Жакып менен Жусуптун уулдарын куткардың.

¹⁷Кудайым, Сени суулар көрүштү, Сени суулар көрүп коркушту, туңгуюктар титирешти.

¹⁸Булуттар сууларын төгүп, асмандан күн күркүрөдү, Сенин жебелериң учту.

¹⁹Сенин добулуңдун үнү бүт асманга жаңырды, чагылган ааламды жарык кылды, жер солкулдап титиреди.

²⁰Сенин жолуң деңизде жатат, Сенин чыйырың чоң сууларда жатат, Сенин изиңди эч ким таппайт.

²¹Өз элиңди Мусанын жана Арундун колу менен койлорду ээрчиткенсип ээрчитип жүрдүң.