Read Кыргыз тилиндеги Библия, 2004 Забур 77 Bible Online

Забур 77 - Кыргыз тилиндеги Библия, 2004 bible

Забур 77

¹Асаптын үйрөтүүсү. Элим, менин мыйзамымды ук, менин оозумдан чыккан сөздөргө кулак сал.

²Менин оозумдан накыл сөздөр чыгат, өткөн заманда болгон окуяларды айтып берем.

³Уккандарыбызды, билгендерибизди, ата-бабаларыбыздын бизге айтып бергендерин баяндайм.

⁴Буларды балдарыбыздан жашырбайбыз, келе жаткан муунга Теңирдин даңкын, күчүн, көрсөткөн кереметтерин жарыя кылам.

⁵Ал Жакып үчүн мыйзам чыгарып, Ысрайыл үчүн мыйзам жазган, ошол мыйзамдарды биздин ата-бабаларыбызга балдарына айтып берүүнү осуят кылган.

⁶Аларды келе жаткан муун, төрөлө турган балдар билиши үчүн, убагы келгенде алар да өз балдарына айтып бериши үчүн,

⁷Кудайдан үмүт кылышы үчүн, Анын иштерин унутпашы үчүн, Анын осуяттарын сакташы үчүн,

⁸өздөрүнүн ата-бабаларындай, жүрөктөрү өзгөрбөгөн, руху менен Кудайга берилбеген, баш ийбес, кежир муун болбошу үчүн осуят кылган.

⁹Куралданган, жаа тарткан Эпрайым уулдары согуш болуп жаткан күнү артка качышты.

¹⁰Алар Кудайдын осуятын сакташкан жок, Анын мыйзамы боюнча жашоодон баш тартышты.

¹¹Анын иштерин жана өздөрүнө көрсөткөн кереметтерин унутушту.

¹²Кудай алардын ата-бабаларынын көз алдында Мисир жеринде, Соан талаасында кереметтерди көрсөттү.

¹³Деңизди жара бөлүп, аларды ошол аркылуу өткөрдү, сууну дубалдай тургузду.

¹⁴Күндүз аларды булут менен, түнкүсүн от жарыгы менен алып жүрдү.

¹⁵Түпсүздүктөн суу чыгарып бергендей, чөлдө ташты жарып, алардын суусунун кандырды.

¹⁶Аскадан суу чыгарды, суу дарыядай акты.

¹⁷Бирок алар Анын алдында күнөө кыла беришти, чөлдө бардыгынан жогору турган Кудайды каарданта беришти.

¹⁸Өз жүрөктөрүндө Кудайды сынап, өздөрү каалаган тамакты талап кылышты.

¹⁹Кудайга каршы сүйлөп: «Чөлдө Кудай дасторкон даярдап бере алмак беле?» – дешти.

²⁰Бирок ал ташты урганда, суу чыгып ага баштады. «Кудай нан бере алмак беле? Ал Өз элине эт бышырып бере алмак беле?» – дешти.

²¹Муну Теңир угуп, катуу каарданды. Жакыпка каршы от жалындап күйдү, Кудайдын каары Ысрайылга каршы бет алды.

²²Анткени алар Кудайга ишенишкен жок, Анын куткарарына ишенишкен жок.

²³Ал асмандагы булуттарга буйрук берип, асман эшиктерин ачты.

²⁴Алардын үстүнө асмандан манна жаадырды, аларга асман нанын берди.

²⁵Адамдар периштелердин нанын жешти, Кудай аларга тамакты тоюшунча берди.

²⁶Асмандан чыгыш шамалын козгоду, Өз күчү менен түштүк шамалын жиберди.

²⁷Аларга этти топурактай жаадырды, канаттууларды деңиз кумундай жаадырды.

²⁸Аларды кошуундарынын арасына, үйлөрүнүн жанына жаадырды.

²⁹Алар жеп, аябай тоюшту. Аларга каалаганын берди.

³⁰Бирок алардын каалоосу кана электе эле, алар тамактарын жута электе эле,

³¹аларга каршы Кудайдын каары келип, алардын бараандууларын өлтүрдү, Ысрайылдын жигиттерин сулатты.

³²Бирок алар ушунун баарын көрүп турушса да, күнөө кыла беришти, Анын кереметтерине ишенишкен жок.

³³Ошол үчүн Кудай алардын жашоо күндөрүн түйшүктүү кылып, жашоо жылдарын дүрбөлөңгө түшүрдү.

³⁴Кудай аларды өлтүрө баштаганда, алар Кудайды издей башташты; Кудайга кайрылып, таң азандан Кудайга жалынышты.

³⁵Кудай өздөрүнүн баш калкалар жайы экенин, бардыгынан жогору турган Кудай өздөрүнүн Куткаруучусу экенин ошондо эстешти.

³⁶Ооздору менен Ага кошомат кылышты, тилдери менен Анын алдында калп айтып жатышты.

³⁷Жүрөктөрү болсо Анын алдында таза эмес эле, алар Анын осуятына берилишкен эмес.

³⁸Бирок Ал ырайымдуулук кылып, алардын күнөөлөрүн кечирди, аларды кырып салган жок. Көп жолу каарын кайт кылды, көп жолу Өзүнүн бүт жаалын козгогон жок.

³⁹Кудай алардын кетсе кайрылып келбей турган адам экенин, жел экенин эске алды.

⁴⁰Алар чөлдө Аны канча жолу каардантышты! Эч ким жашабаган жерде Аны канча жолу ачуулантышты!

⁴¹Кудайды кайрадан сынашты, Ысрайылдын Ыйыгына акарат келтиришти.

⁴²Алар Анын куткарган колун, Анын эзүүдөн куткарган күнүн унутушту.

⁴³Анын Мисирде жасаган кереметтерин жана Соан талаасындагы ажайыптарын унутушту.

⁴⁴Алар суу иче албай калышы үчүн, Кудай алардын дарыялары менен өзөндөрүн канга айландырды.

⁴⁵Аларды чактырыш үчүн курт-кумурскаларды, өлтүрүш үчүн курбакаларды каптатты.

⁴⁶Алардын өстүргөн өсүмдүктөрүн кырк аяктарга, алардын эмгегин чегирткелерге жем кылды.

⁴⁷Алардын жүзүмдөрүн мөндүр менен, тыт жыгачтарын муз менен талкалады.

⁴⁸Алардын бодо малын добул менен, майда малын чагылган менен кырды.

⁴⁹Аларга Өзүнүн каарынын жалынын, ачуусун, жаалын жана алааматын каптатып, кыйратуучу периштелерди жөнөттү.

⁵⁰Өзүнүн каарын кандыруунун жолун тапты, алардын жанын өлүмдөн сактаган жок, малдарына жугуштуу оору каптатты.

⁵¹Мисирдеги бардык тун балдарды, Хам чатырларындагы бардык күч башаттарын өлтүрдү.

⁵²Анан Өз элин койлордой алып жөнөдү, аларды чөлдө койлордой алып жүрдү.

⁵³Аларды коопсуз алып жүрдү, алар коркушкан жок, алардын душмандарын болсо деңиз басып калды.

⁵⁴Аларды Өзүнүн ыйык жерине, Өзүнүн оң колу менен ээлеп алган ушул тоого алып келди.

⁵⁵Алардын алдынан элдерди кууп жиберип, алардын жерин аларга мурас кылып бөлүп берди, Ысрайыл урууларын алардын үйлөрүнө киргизди.

⁵⁶Бирок алар бардыгынан жогору турган Кудайды дагы сынашты, капалантышты, Анын мыйзамдарын сакташкан жок.

⁵⁷Ата-бабаларына окшоп туруксуз, ишенимсиз болушту, кайып кеткен жебедей артка кетишти.

⁵⁸Өздөрүнүн бийик жерлери менен Аны каардантышты, таш буркандары менен Анын кызганычын козгошту.

⁵⁹Кудай муну угуп, катуу каарданды, Ысрайылга аябай ачууланды.

⁶⁰Кудай Шилодо турган үйүн, адамдар арасында Өзү жашаган жыйын чатырын таштап кетти.

⁶¹Өзүнүн чебин туткунга, Өзүнүн даңкын душмандардын колуна салып берди.

⁶²Өз элин кылыч мизине салып берди, Өз мурасына ачууланды.

⁶³Элдин жигиттерин от жалмады, анын кыздарына арнап нике ырларын ырдабай калышты.

⁶⁴Ыйык кызмат кылуучулары кылычтан өлүп жатышты, жесирлери ыйлабай калышты.

⁶⁵Бирок Теңир уйкудан ойгонгонсуп, шараптан соолуга албай жаткан алптай болуп, ордунан туруп келди да,

⁶⁶анын душмандарын артка качырды, түбөлүккө уятка калтырды.

⁶⁷Жусуптун чатырын четке какты, Эпрайым уруусун тандап алган жок.

⁶⁸Тескерисинче, Жүйүт уруусун жана Өзү сүйгөн Сион тоосун тандап алды.

⁶⁹Өзүнүн ыйык жайын асмандай бийик кылып курду, жердей кылып түбөлүккө тургузду.

⁷⁰Өз кулу Дөөттү кой короодон тандап алды, аны алып чыкты.

⁷¹Аны саан малдан бөлүп алып, Өз эли Жакыпты, Өз мурасы Ысрайылды кайтартуу үчүн алып келди.

⁷²Дөөт аларды таза жүрөк менен кайтарды, аларды акылман колу менен жетектеп жүрдү.