Read Кыргыз тилиндеги Библия, 2004 Забур 80 Bible Online

Забур 80 - Кыргыз тилиндеги Библия, 2004 bible

Забур 80

¹Ырчылар тобунун башчысына. Гиттит күү аспабы менен. Асаптын забуру.

²Биздин тирегибиз болгон Кудайга кубаныч менен ырдагыла. Жакыптын Кудайына кубанычтуу үн салгыла!

³Ырдагыла, дапты, мукам үндүү гуслини арфа менен кошо бергиле.

⁴Ай жаңырганда, белгиленген убакта, биздин майрам күнүбүздө сурнай тарткыла.

⁵Анткени бул – Ысрайыл үчүн мыйзам, Жакыптын Кудайынын буйругу.

⁶Кудай бул мыйзамды Жусуп Мисир жеринен чыкканда, ага күбө болсун деп бекитти. Жусуп ал жерде өзү билбеген тилди угуп жүргөн.

⁷Теңир мындай деди: «Мен андан оор жүктөрдү алып салдым, анын колдору себеттерден бошоду.

⁸Башыңа кыйынчылык түшкөндө, Мени чакырдың, ошондо Мен сени куткардым. Мен сага добулдун арасынан жооп бердим, сени Мериба суусунун жанында сынадым.

⁹Элим, ук, Мен сага күбөлөндүрөм. Ысрайыл! Оо, сен Мени уксаң кана!

¹⁰Сенде башка кудай болбосун, бөлөк элдин кудайына сыйынба.

¹¹Мен Теңирмин, сени Мисир жеринен алып чыккан Кудайыңмын. Оозуңду чоң ач, Мен аны толтурам».

¹²Бирок Өз элим Менин үнүмдү укпай койду, Ысрайыл Мага моюн сунбай койду.

¹³Ошондуктан Мен аларды өздөрүнүн көшөргөн жүрөгүнүн эркине койдум, өздөрү каалаган жол менен жүрө беришсин дедим.

¹⁴Оо, Өз элим Мени укса кана! Ысрайыл Менин жолдорум менен жүрсө кана!

¹⁵Анда Мен алардын душмандарын тез эле моюн сундурар элем, колумду аларды куугунтукка алгандарга каршы сунар элем.

¹⁶Теңирди жек көргөндөр аларга кошомат кылып турар эле, ал эми алардын жыргал турмушу дайыма улана бермек.

¹⁷Мен аларды буудайдын эң жакшысы менен азыктантар элем, тоо балына тойгузар элем.