Read Кыргыз тилиндеги Библия, 2004 Забур 82 Bible Online

Забур 82 - Кыргыз тилиндеги Библия, 2004 bible

Забур 82

¹Ыр. Асаптын забуру.

²Кудай! Унчукпай тура бербе, сүйлөбөй тура бербе, Кудайым, тынч тура бербе!

³Анткени душмандарың чурулдап жатышат, Сени жек көргөндөр баштарын көтөрүштү.

⁴Сенин элиңе каршы жамандык издеп жатышат, Өзүң сактагандарга каршы кеңешип жатышат.

⁵Алар: «Барып, аларды кырып салалы, Ысрайыл деген ысым мындан кийин эске алынгыс болсун», – деп айтышты.

⁶Өз ара бир добуштан макулдашып, Сага каршы келишим түзүштү:

⁷эдомдуктар менен ысмайылдыктар, мааптыктар менен агрылыктар,

⁸Гебал, Амон, Амалык, Пелишти тургундары Тирдин тургундары менен келишим түзүштү.

⁹Ашур эли да аларга кошулду. Алар Лот уулдарына күч беришти.

¹⁰Мидианга, Сисрага жана Кишон суусунун жээгинде Жабинге кандай кылсаң, аларга да ошондой кыл.

¹¹Алар Эйен-Дордо кырылып, жерге төгүлгөн кык болуп калышкан.

¹²Орейип менен Зейепке кандай кылсаң, аларга жана алардын төрөлөрүнө да ошондой кыл; Зебак менен Салмунга кандай кылсаң, алардын башчыларына да ошондой кыл.

¹³Алар: «Кудайдын элин басып алабыз», – дешкен.

¹⁴Кудайым! Алар куюн учурган топурактай, шамал учурган самандай болушсун.

¹⁵От токойду өрттөгөндөй, жалын тоолорду жалмагандай,

¹⁶Сен да аларды бороонуң менен куу, куюнуң менен дүрбөлөңгө сал.

¹⁷Аларды уятка калтыр, алар Сенин ысымыңды издешсин, Теңирим!

¹⁸Түбөлүккө уятка калышсын, коркуп калышсын, шылдың болушсун, кырылышсын.

¹⁹Бир гана Сенин ысымың Жахаба экенин, жер үстүндөгү бардыгынан жогору турган Кудай Сен экениңди билишсин.