Read Кыргыз тилиндеги Библия, 2004 Забур 83 Bible Online

Забур 83 - Кыргыз тилиндеги Библия, 2004 bible

Забур 83

¹Ырчылар тобунун башчысына. Гиттит күү аспабы менен. Корактын уулдарыныкы. Забур.

²Турак жайларың кандай сонун, Себайот Теңир!

³Теңирдин короосун көксөп, жаным аябай алсырады. Менин жүрөгүм да, денем да тирүү Кудайды даңктап ырдап жатат.

⁴Кудуреттүү Теңирим, Падышам, Кудайым, Сенин курмандык чалынуучу жайыңдын жанынан чымчык да өзүнө жай табат, чабалекей да балапандарын басып чыгарганга уя табат.

⁵Сенин үйүңдө жашагандар бактылуу, алар Сени тынбай мактап турушат.

⁶Күчтү Сенден алган, жүрөгү Сага бурулган адам бактылуу.

⁷Ый өрөөнү менен өтүп бара жатып, алар ал жерден булак ачышат. Жамгыр да ал өрөөнгө батасын төгөт.

⁸Алардын күчүнө күч кошулуп, Сиондогу Кудайдын алдына келишет.

⁹Теңир, Себайот Кудай! Менин сыйынуумду ук, Жакыптын Кудайы, мага кулак сал!

¹⁰Кудайыбыз, биздин коргоочубуз, бизге назарыңды сал! Өзүңдүн майлаганыңдын жүзүн кара.

¹¹Анткени Сенин корооңдо бир күн болуу миң күндөн артык. Мыйзамсыздардын үйүндө жашаганга караганда, Кудайдын үйүнүн улагасында болууну каалайм.

¹²Анткени Кудай-Теңир – күн жана калкан, Теңир ырайымын төгүп, даңкка бөлөйт. Таза жүргөндөрдү Ал жакшылыктан ажыратпайт.

¹³Себайот Теңир! Сага таянган адам бактылуу!