Read Кыргыз тилиндеги Библия, 2004 Забур 85 Bible Online

Забур 85 - Кыргыз тилиндеги Библия, 2004 bible

Забур 85

¹Дөөттүн забуру. Теңир, мага кулак сал, мени ук, анткени мен жардымын жана жакырмын.

²Жанымды сактап кал, анткени мен Сенин алдыңда коркуп турам. Кудайым, Сага таянган кулуңду куткар.

³Мага ырайым кыл, Теңирим, анткени мен Сени күн сайын чакырам.

⁴Өз кулуңду кубандыр, анткени мен өзүмдүн жанымды Сенин алдыңа алып келем.

⁵Анткени Сен, Теңирим, ырайымдуусуң жана боорукерсиң, Сени чакыргандардын баарына көп жолу ырайым кыласың.

⁶Менин сыйынуумду ук, Теңир, менин жалынуума кулак сал.

⁷Кайгыга баткан күнү Сени чакырам, анткени Сен мени угасың.

⁸Кудайлардын арасында Сендей жок, Теңирим, Сенин иштериңдей иш жок.

⁹Сен жараткан элдердин баары Сенин алдыңа келип таазим кылышат, Теңирим, Сенин ысымыңды даңкташат.

¹⁰Анткени Сен улуусуң, кереметтерди жасайсың, Сен жалгыз Кудайсың.

¹¹Сенин чындык жолуңда жүрүшүм үчүн, мени Өз жолуңа сал, Теңирим. Сенин ысымыңдан коркуп турушум үчүн, жүрөгүмдү бекемде.

¹²Сени чын жүрөгүмдөн мактайм, Теңирим, Сенин ысымыңды түбөлүккө даңктайм.

¹³Анткени Сен мага улуу ырайым көрсөттүң. Сен менин жанымды өлгөндөр жаткан жайдын түпкүрүнөн куткарып алдың.

¹⁴Кудайым! Текеберлер мага каршы чыгышты, козголоңчулар тобу мени өлтүргүсү келип издеп жүрөт. Алар Сени эстерине алышпайт.

¹⁵Бирок Сен, Теңирим, Кудайым, кайрымдуусуң, ырайымдуусуң, чыдамдуусуң, абдан боорукерсиң, адилеттүүсүң.

¹⁶Мага назарыңды сал, мага ырайым кыл. Өз кулуңа Өз күчүңдү бер, Өз күңүңдүн уулун куткар.

¹⁷Мага ырайым кылганыңды билдирген белги бер, мени жек көргөндөр көрүп, уятка калышсын, анткени Сен, Теңирим, мага жардам бердиң, мени соороттуң.