Read Кыргыз тилиндеги Библия, 2004 Забур 87 Bible Online

Забур 87 - Кыргыз тилиндеги Библия, 2004 bible

Забур 87

¹Ыр. Забур. Корактын уулдарыныкы. Ырчылар тобунун башчысына, махалат күү аспабы менен. Эйман Эзрахинин үйрөтүүсү.

²Теңирим, менин куткаруучу Кудайым! Күндүр-түндүр Сенин алдыңда боздоп ыйлайм.

³Менин сыйынуум Сенин алдыңа жетсе экен. Менин жалбаруума кулак сала көр.

⁴Анткени менин жаным кайгыга батты, өмүрүм өлгөндөр жаткан жайга жакындап калды.

⁵Мен көргө киргендерге окшоп калдым, мен күчү жок адамдай болуп калдым.

⁶Сен унутуп койгон, Сенин колуң таштап койгон, өлүктөр арасына ташталган, табытта жаткан, өлтүрүлгөн адамга окшоп калдым.

⁷Сен мени өлгөндөр жаткан жайга, караңгылыкка, туңгуюкка түшүрдүң.

⁸Менин үстүмдөгү каарың мени кыйнады, Сен мени Өзүңдүн бүт толкундарың менен кыйраттың.

⁹Сен мени жакындарымдан алыстаттың, мени аларга жийиркеничтүү кылдың. Мен туткундамын, чыга албай жатамын.

¹⁰Көзүм кайгыдан тунарды: күн бою Сени чакырдым, Теңирим, Сага колдорумду сундум.

¹¹Сен өлгөндөргө керемет көрсөтмөк белең? Өлгөндөр туруп, Сени даңкташмак беле?

¹²Сенин ырайымың мүрзөдө айтылмак беле? Сенин чындыгың чириген жерде айтылмак беле?

¹³Сенин кереметтериңди караңгылыкта билишмек беле? Сенин чындыгыңды унутулгандардын жеринде билишмек беле?

¹⁴Ошондой болсо да, Теңирим, мен Сени чакырам, менин таң заардагы сыйынуум Сени тосуп алат.

¹⁵Эмне үчүн, Теңир, менин жанымды таштадың? Эмне үчүн менден Өз жүзүңдү жашырасың?

¹⁶Мен бактысызмын, жаш чагымдан эле кыйналып келе жатам. Сен берген кыйынчылыктарды көтөрүп жүрүп, алсырап бара жатам.

¹⁷Сенин каарың менин үстүмдөн өттү. Сенин үрөйдү учурган коркунучтарың мени кыйратты.

¹⁸Алар мени ар күнү суудай курчап жатышат; баары чогулуп, мени тегеректеп жатышат.

¹⁹Мени чыныгы досумдан алыстаттың, тааныштарым көрүнбөйт.