Read Кыргыз тилиндеги Библия, 2004 Забур 88 Bible Online

Забур 88 - Кыргыз тилиндеги Библия, 2004 bible

Забур 88

¹Эйтан Эзрахинин үйрөтүүсү.

²Теңирим, Сенин ырайымыңды түбөлүккө ырдайм, чындыгыңды укумдан-тукумга өз оозум менен жар салам.

³Мен мындай деп айтам: Сенин ырайымың түбөлүккө негизделген, асманга Өз чындыгыңды орноттуң да, мындай деп айттың:

⁴«Мен Өзүмдүн тандап алган адамым менен келишим түздүм, Өз кулум Дөөткө ант бердим:

⁵Сенин тукумуңду түбөлүккө бекемдейм, тактыңды укумдан-тукумга орнотом».

⁶Теңирим, асман да Сенин кереметтүү иштериңди даңктайт, Сенин чындыгыңды ыйыктардын жыйынында айтат.

⁷Анткени асманда Теңирге тең келер ким бар? Кудайдын уулдарынын арасында Теңирге окшош ким бар?

⁸Кудай ыйыктардын улуу жыйынында коркунучтуу, Ал Өзүнүн тегерегиндегилердин бардыгына коркунучтуу.

⁹Теңир, Себайот Кудай! Теңирим, Сендей күчтүү ким бар? Акыйкатың Өзүңдүн тегерегиңде.

¹⁰Сен деңиздин каарына бийлик кыласың; анын толкундары жогору көтөрүлгөндө, Сен аларды басасың.

¹¹Сен Раапты байкуш кылып басынттың, душмандарыңды Өзүңдүн кудуреттүү күчүң менен чачыратып жибердиң.

¹²Асман да, жер да Сеники, ааламды жана андагы бардык нерселерди Сен негиздедиң.

¹³Түндүк менен түштүктү Сен жараттың. Табор менен Хермон Сенин ысымыңды укканда кубанат.

¹⁴Сенин билегиң күчтүү, Сенин колуң кубаттуу, Сенин оң колуң жогору көтөрүлгөн!

¹⁵Адилеттик жана чындык – Өз тактыңдын негизи. Ырайым менен чындык Сенин алдыңда жүрөт.

¹⁶Сурнай үнүн тааныган эл бактылуу! Алар Сенин жүзүңдүн жарыгы астында жүрүшөт, Теңирим.

¹⁷Күн сайын Сенин ысымың менен кубанышат, Сенин чындыгың менен жогору көтөрүлүшөт,

¹⁸анткени алардын күчү да, даңкы да Сенсиң, Сенин жакшы ниетиң боюнча биздин мүйүзүбүз көккө көтөрүлөт.

¹⁹Биздин калканыбыз – Теңирден, биздин падышабыз – Ысрайылдын Ыйыгынан.

²⁰Бир жолу Сен көрүнүштө Өзүңдүн ыйыгыңа мындай дедиң эле: «Мен эр жүрөккө жардам бердим, эл ичинен тандалганды жогору көтөрдүм.

²¹Мен Өз кулум Дөөттү таптым, аны Өзүмдүн ыйык зайтун майым менен майладым.

²²Менин колум аны менен болот, Менин күчүм ага күч берет.

²³Душман аны жеңе албайт, мыйзамсыз адам кыса албайт.

²⁴Душмандарын көз алдында талкалайм, аны жек көргөндөрдү кыйратам.

²⁵Менин чындыгым да, Менин ырайымым да аны менен, Менин ысымым менен анын мүйүзү көккө көтөрүлөт.

²⁶Анын колун деңизге салам, оң колун дарыяларга салам.

²⁷Ал Мени: “Сен менин атамсың, Кудайымсың жана куткаруучу аскамсың”, – деп чакырат.

²⁸Мен аны тун уулум кылып, жердеги падышалардан жогору коём.

²⁹Ага көрсөткөн Өзүмдүн ырайымымды түбөлүк сактайм, Менин аны менен түзгөн келишимим бузулбайт.

³⁰Анын тукуму түбөлүк жашайт, анын тактысы асман жок болгончо турат.

³¹Эгерде анын уулдары Менин мыйзамымды таштап, Менин осуяттарымды сакташпаса,

³²Менин мыйзамдарымды бузуп, Менин осуяттарымды аткарышпаса,

³³анда Мен аларды өздөрүнүн мыйзамсыздыгы үчүн темир таяк менен жазалайм, аларга өздөрүнүн күнөөлөрү үчүн сокку урам.

³⁴Бирок Мен аны Өз ырайымымдан ажыратпайм жана Өз чындыгымды өзгөртпөйм.

³⁵Мен Өз келишимимди бузбайм жана оозумдан чыккан сөзүмдү өзгөртпөйм.

³⁶Бир жолу Мен Өзүмдүн ыйыктыгым менен ант бергем: Дөөткө калп айтпайм.

³⁷Анын тукуму түбөлүк жашайт, анын тактысы Менин алдымда күн сыяктуу турат.

³⁸Ай сыяктуу кылымдар бою асманда ишенимдүү күбө болуп бекем турат».

³⁹Бирок азыр Сен Өзүңдүн майланганыңдан баш тартып, аны жек көрүп, ага каарданып жатасың.

⁴⁰Өз кулуң менен түзгөн келишимиңди четке кактың, анын таажысын жерге кулаттың.

⁴¹Анын бардык тосмолорун талкаладың, анын сепилдерин урандыга айландырдың.

⁴²Жолдон өткөндөрдүн баары аны талап жатышат. Ал өзүнүн коңшуларына күлкү болду.

⁴³Сен анын душмандарынын оң колун жогору көтөрдүң, анын бардык кас душмандарын кубанттың.

⁴⁴Сен анын кылычынын мизин тескери караттың, ага майданда күч берген жоксуң.

⁴⁵Аны даңктан ажыраттың, тактысын жерге кулаттың.

⁴⁶Анын жаштык күндөрүн кыскарттың, уятка калтырдың.

⁴⁷Теңирим, качанга чейин жашына бересиң? Түбөлүккө жашынасыңбы? Качанга чейин каарың от болуп жана берет?

⁴⁸Менин өмүрүмдүн кыскалыгын эстечи. Сен адам баласын кандай түйшүккө жараттың эле?

⁴⁹Адамдардын арасынан ким жашап, бирок өлүмдү көрбөй калды экен? Ким өз жанын өлгөндөр жаткан жайдын колунан куткарып алды экен?

⁵⁰Мурунку ырайымдарың кайда, Теңирим? Сен Дөөткө Өз чындыгың менен ант бербедиң беле.

⁵¹Теңирим, Өз кулдарыңдын көргөн кордугун эстечи, мен күчтүү элдердин баарынан кордук көрүп жатам.

⁵²Сенин душмандарың мени кордоп жатышат! Теңирим, Өзүңдүн майлаганыңдын баскан издерин жаманатты кылып жатышат!

⁵³Теңирге түбөлүккө даңк! Оомийин, оомийин!