Read Кыргыз тилиндеги Библия, 2004 Забур 90 Bible Online

Забур 90 - Кыргыз тилиндеги Библия, 2004 bible

Забур 90

¹Бардыгынан жогору турган Кудайдын үйүндө жашаган, кудуреттүү Кудайды далдаа кылган адам Теңирге:

²«Мен таянган Кудай менин баш калкалар жайым, менин чебим!» – дейт.

³Ал сени аңчынын торунан жана айыкпас дарттан куткарат.

⁴Ал сени Өзүнүн канаттары менен калкалайт, Анын канаттарынын астында коопсуз болосуң. Анын чындыгы – калкан жана коргон.

⁵Түнкү коркунучтардан, күндүзгү учкан жебелерден,

⁶караңгылыкта жүргөн каргашадан, чак түштө кырган жугуштуу оорудан коркпойсуң.

⁷Жаныңда миң, оң жагыңда он миң кырылып жатса да, сага жакындабайт.

⁸Өз көзүң менен карап гана турасың, кудайсыздардын жазаланганын көрөсүң.

⁹Анткени сен: «Менин тирегим – Теңир», – дегенсиң. Бардыгынан жогору турган Кудайды өзүңө баш калкалар жай кылып тандап алгансың.

¹⁰Сен эч кандай жамандык көрбөйсүң, үйүңө жугуштуу оору жолобойт.

¹¹Анткени Ал Өз периштелерине сени бардык жолдоруңда коргоп жүрүүнү буйруйт.

¹²Бутуңду ташка уруп албашың үчүн, алар сени колдоруна көтөрүп кетишет.

¹³Уулуу жылан менен арстанды бутуң менен басасың, жаш арстан менен ажыдаарды тебелейсиң.

¹⁴«Мени сүйгөндүгү үчүн, аны куткарам, коргойм, анткени ал Менин ысымымды таанып билди.

¹⁵Мени чакырганда, аны угам. Башына кыйынчылык түшкөндө, Мен аны менен бирге болом. Аны куткарам, даңктайм.

¹⁶Анын өмүрүн узун кылам, ага Өзүмдүн куткаруумду көрсөтөм».