Read Кыргыз тилиндеги Библия, 2004 Забур 93 Bible Online

Забур 93 - Кыргыз тилиндеги Библия, 2004 bible

Забур 93

¹Теңирим, өч алуучу Кудайым, өч алуучу Кудайым, Өзүңдү көрсөт!

²Ордуңдан тур, жер жүзүнүн Соту, текеберлердин жазасын бер!

³Теңирим, качанкыга чейин кудайсыздар салтанат курушат, качанкыга чейин салтанат курушат?

⁴Алар өктөм сүйлөп жатышат, мыйзамсыз иштерди кылгандар менменсинип жатышат.

⁵Сенин элиңди тепсеп жатышат, Теңирим, Сенин мурасыңды эзип жатышат.

⁶Жесирди, келгинди өлтүрүп, жетимдердин өмүрүн кыйып жатышат.

⁷Алар: «Теңир көрбөйт, Жакыптын Кудайы билбейт», – дешет.

⁸Эсиңерге келгиле, акылсыз адамдар! Деги качан эсиңерге келесиңер, акылы жоктор?

⁹Кулакты берген Кудай укпайт бекен? Көздү берген Кудай көрбөйт бекен?

¹⁰Элдерди эсине келтирген, адамга акыл үйрөткөн Кудай ашкерелебейт бекен?

¹¹Адамдын ойлору курулай убаракерчилик экенин Теңир билет.

¹²Сен эсине келтирген адам бактылуу, Теңирим. Кудайсыз адамдын көрү казылганга чейин, башына кыйынчылык түшкөн күндөрү Сен ага тынчтык бериш үчүн, Өз мыйзамыңды үйрөткөн адам бактылуу, Теңирим.

¹⁴Анткени Теңир Өзүнүн элинен баш тартпайт, Өзүнүн мурасын таштабайт.

¹⁵Анткени сот чындыкка кайрылат, анын артынан жүрөгү тазалардын баары ээрчишет.

¹⁶Ким мен үчүн кара ниеттерге каршы чыгат? Ким мен үчүн мыйзамсыз иш кылгандарга каршы турат?

¹⁷Теңир менин жардам берүүчүм болбогондо, менин жаным бат эле унчукпас өлкөдөн жай алмак.

¹⁸Мен: «Бутум тайып бара жатат», – дегенде, Сенин ырайымың мени колдогон, Теңирим.

¹⁹Менин жүрөгүмдө кайгы көбөйгөндө, Сенин сооротууларың жанымды жыргатат.

²⁰Кыйратуучулардын тактысында отуруп, мыйзамды кыянаттык менен пайдалангандар Сени менен шериктеш боло алышабы?

²¹Алар топ-топ болуп, адил адамды өлтүрүүгө жулунушат жана күнөөсүз канды күнөөлөшөт.

²²Бирок Теңир менин тирегим, Кудайым менин баш калкалар аска-зоом.

²³Теңир алардын мыйзамсыздыгын өздөрүнүн баштарына салат, өздөрүнүн кылмышы менен өздөрүн өлтүрөт, аларды биздин Кудай-Теңирибиз кырып жок кылат.