Read Кыргыз тилиндеги Библия, 2004 Забур 94 Bible Online

Забур 94 - Кыргыз тилиндеги Библия, 2004 bible

Забур 94

¹Келгиле, Теңирди мактап ырдайбыз, биздин куткаруучу тирегибизди кубануу менен мактайбыз!

²Анын алдына даңктоо сөздөр менен келели, Аны ыр менен даңктайлы.

³Анткени Теңир – улуу Кудай жана бардык кудайлардын үстүнөн улуу Падыша.

⁴Жер тереңдиктери Анын колунда, тоо чокулары да Аныкы.

⁵Деңиз да Аныкы, деңизди Ал жараткан, кургактыкты да Анын колдору жараткан.

⁶Келгиле, Жаратуучубузга – Теңирибизге табыналы, таазим кылалы, Анын алдында тизе бүгөлү.

⁷Анткени Ал биздин Кудайыбыз, биз Анын жайытындагы элбиз, Анын колу менен жаратылган койлорбуз. Оо, силер Анын үнүн азыр уксаңар кана:

⁸«Мериба жеринде, чөлдөгү сыноо күндөрүндө жүрөгүңөрдү өжөрлөнткөндөй, жүрөгүңөрдү өжөрлөнтпөгүлө.

⁹Ал жерлерде Мени силердин ата-бабаларыңар сынашты. Менин иштеримди көрүп турушса да, алар Мени сынашты.

¹⁰Мени бул эл кырк жыл каардантты, ошондо Мен мындай дедим: “Бул эл – жүрөгү менен адашкан эл. Алар Менин жолдорумду таанып билишкен жок.

¹¹Ошондуктан Мен каарданып турганымда: «Алар Менин бейпил жайыма киришпейт», – деп ант бердим”».