Read Кыргыз тилиндеги Библия, 2004 Забур 95 Bible Online

Забур 95 - Кыргыз тилиндеги Библия, 2004 bible

Забур 95

¹Теңирди жаңы ыр менен даңктагыла. Бүт жер жүзү, Теңирди мактап ырда!

²Теңирге ырдагыла, Анын ысымын даңктагыла, Анын куткаруусун күн сайын жарыялагыла!

³Элдер арасында Анын даңкын жарыя кылгыла, бардык уруулар арасында Анын кереметтерин даңаза кылгыла!

⁴Анткени Теңир улуу жана мактоого татыктуу, Ал бардык кудайлардан коркунучтуу.

⁵Анткени бардык элдердин кудайлары – жасалма кудайлар, ал эми Теңир асманды жараткан.

⁶Даңк менен улуулук Анын алдында, күч жана ыйыктык Анын ыйык жайында.

⁷Бүт элдер, Теңирге Өзүнө тиешелүүсүн бергиле, Теңирди даңктагыла жана урматтагыла.

⁸Теңирди даңктагыла, Анын ысымын даңазалагыла, тартууларды алып келгиле, Анын короосуна киргиле.

⁹Теңирге Өзүнүн ыйык жайында табынгыла. Бүт жер жүзү, Анын алдында титире!

¹⁰Бүт элдерге мындай деп айткыла: «Теңир падышачылык кылып жатат! Ошондуктан аалам бекем, солк этпейт. Ал элдерди адилет соттойт».

¹¹Асман кубансын, жер шаттансын. Деңиз шарпылдасын, анын ичиндегилер кубансын.

¹²Талаа да, талаадагы бардык нерселер да кубансын, токойдогу бардык дарактар сүйүнсүн.

¹³Бардыгы Теңирдин алдында кубанышсын. Анткени Ал келе жатат, анткени Ал жерди соттош үчүн келе жатат. Ал ааламды адилеттик менен соттойт, элдерди Өз акыйкаттыгы менен соттойт.