Read Кыргыз тилиндеги Библия, 2004 Забур 96 Bible Online

Забур 96 - Кыргыз тилиндеги Библия, 2004 bible

Забур 96

¹Теңир падышачылык кылып жатат: жер кубансын, сансыз аралдар шаттансын.

²Анын тегереги – булут жана караңгылык. Анын тактысынын негизи – адилеттик жана акыйкаттык.

³Анын алдында от бара жатат, ал Анын тегерегиндеги душмандарын куйкалап жатат.

⁴Анын чагылгандары ааламды жарык кылат. Муну көрүп жер титирейт.

⁵Тоолор бүт жер жүзүнүн Теңиринин жүзүнөн мом сыяктуу эрип жатат.

⁶Асман Анын чындыгын жарыя кылып жатат, бардык элдер Анын даңкын көрүп жатышат.

⁷Таш буркандарга кызмат кылгандар жана жасалма кудай менен мактангандар уятка калышсын. Бардык кудайлар, Анын алдына жыгылгыла.

⁸Сион тоосу угуп кубанып жатат; Теңир, Сенин адилет сотуң үчүн Жүйүт кыздары кубанып жатышат.

⁹Анткени Сен, Теңир, бүт жер жүзүнөн жогору турасың, Сен бардык кудайлардан жогорусуң.

¹⁰Теңирди сүйгөндөр, жамандыкты жек көргүлө! Ал Өзүнүн ыйыктарынын жанын сактайт, аларды кудайсыздардын колунан куткарат.

¹¹Адил адамга жарык тиет, жүрөгү тазаларга шаттык келет.

¹²Адил адамдар, Теңирди ойлоп кубангыла, Анын ыйыктыгын эстеп даңктагыла!