Read Кыргыз тилиндеги Библия, 2004 Накыл 1 Bible Online

Накыл 1 - Кыргыз тилиндеги Библия, 2004 bible

Накыл 1

¹Ысрайыл падышасы Дөөттүн уулу Сулаймандын накыл сөздөрү.

²Бул сөздөр акылмандыкка жетиш үчүн, акыл-насаатты угуш үчүн, накыл кептерди түшүнүш үчүн,

³эстүүлүктүн, адилеттүүлүктүн, соттун, чындыктын эрежелерин өздөштүрүш үчүн,

⁴жөнөкөйлөргө зээндүүлүк, жаш жигитке билим жана эстүүлүк бериш үчүн жазылган.

⁵Бул сөздөргө акылман адам кулак төшөп, билимин арттырат, акылдуу адам акылдуу кеңештерди табат.

⁶Ошондо ал накыл сөздөрдү, нуска кептерди, даанышмандардын сөздөрүн жана табышмактарын түшүнөт.

⁷Акылмандыктын башталышы – Теңирден коркуу. Акылмандык менен акыл-насаатты акылы жоктор гана жек көрүшөт.

⁸Уулум, атаңдын акыл-насаатын ук, энеңдин кеңешин четке какпа.

⁹Анткени бул – башыңа кооз таажы, мойнуңа мончок.

¹⁰Уулум! Эгерде сени күнөөкөрлөр азгырса, макул болбо.

¹¹Эгерде алар мындай дей турган болсо: «Жүр биз менен, киши өлтүрүш үчүн буктурма коёбуз, айыпсыз, таза адамды аңдыйбыз,

¹²аларды өлгөндөр жаткан жай жуткансып, тирүүлөй жутуп алабыз, көргө түшкөндөргө окшотуп, бүкүлү жутуп алабыз.

¹³Ар кыл асыл буюмдарды жыйып алабыз, үйлөрүбүздү олжого толтурабыз.

¹⁴Биз менен бирге өкчөмө таш ыргытасың, баарыбыздын казынабыз бир болот!»

¹⁵Уулум! Аларга кошулба, алардын жолуна түшпө.

¹⁶Анткени алардын буттары кыянаттык кылууга чуркайт, кан төгүүгө шашат.

¹⁷Канаттуулардын көзүнчө тор жаюу бекер,

¹⁸алардын канын төгүш үчүн буктурма коюшат, алардын жанын алыш үчүн аңдып турушат.

¹⁹Бирөөнүн байлыгына көз арткан ар бир адамдын жолу ушундай болот: тартып алган байлыгы аны өмүрүнөн ажыратат.

²⁰Акылмандык көчөлөрдө жар салып жүрөт, аянттарда угуза сүйлөп жатат,

²¹көп эл чогулган жерлерде жар салып, шаар дарбазасынын кире беришинде мындай деп сүйлөп жатат:

²²«Түркөйлөр, качанга чейин түркөйлүктү жакшы көрө бересиңер? Шылдыңчылдар качанга чейин өздөрүнүн шылдыңдоолоруна маашырлана беришет? Акылсыздар качанга чейин билимди жек көрүшөт?

²³Мен ашкерелеп жатам, көңүл бургула: мына, мен силерге өз рухумду төгөм, өз сөзүмдү жарыя кылам.

²⁴Мен силерди чакырдым, бирок силер укпай койдуңар. Силерге колумду сундум, бирок силер көңүл бурбай койдуңар.

²⁵Менин кеңештеримдин бардыгын четке кактыңар, ашкере кылганымды кабыл албай койдуңар.

²⁶Ошон үчүн мен да силердин өлүмүңөргө күлөм, башыңарга мүшкүл түшкөндө сүйүнөм.

²⁷Силерди коркунуч бороондой каптаганда, кырсык бурганактай басканда, башыңарга кайгы жана кыйынчылык келгенде,

²⁸мени чакырасыңар, бирок мен силерди укпайм. Мени таң заардан издейсиңер, бирок таппайсыңар.

²⁹Анткени алар билимди жек көрүштү, Теңирден коркууну тандап алышкан жок.

³⁰Менин кеңештеримди кабыл алышкан жок, менин ашкере кылганымды жек көрүштү.

³¹Ошон үчүн алар өздөрүнүн жолунун жемиштеринен жешет, өздөрүнүн ойлорунун жемишине тоюшат.

³²Анткени наадандарды өжөрлүгү өлтүрөт, акылсызды камырабастыгы өлтүрөт.

³³Мени уккандар болсо жамандыктан коркпой, коопсуз, бейкапар жашашат».