Read Кыргыз тилиндеги Библия, 2004 Накыл 10 Bible Online

Накыл 10 - Кыргыз тилиндеги Библия, 2004 bible

Накыл 10

¹Сулаймандын накыл сөздөрү. Акылдуу уул атасын кубантат, акылсыз уул – энесинин кайгысы.

²Жалган жолдор менен табылган байлык пайда алып келбейт, адилдик болсо өлүмдөн куткарат.

³Теңир адил адамга ачкачылыктын азабын тартууга жол бербейт, мыйзамсыздын жыйып алганын алып ыргытат.

⁴Эринчээк кол жарды кылат, аракетчил кол байытат.

⁵Жайында түшүм жыйган уул – акылдуу уул, оруу-жыюу маалында уктап жаткан уул – уятка калтырчу уул.

⁶Адил адам батага ээ болот, мыйзамсыздардын оозу зомбулукту жаап-жашырат.

⁷Адил адам алкоо менен эскерилет, мыйзамсыздардын аты өчөт.

⁸Жүрөгү акылдуу адам осуяттарды кабыл алат, акылсыз адам оозунан жаңылып жыгылат.

⁹Түз жүргөн адам коопсуз жашайт, ал эми түз жолдон чыккан адам жазаланат.

¹⁰Көзүн ымдаган адам бирөөнү ыза кылат, ал эми акылсыз адам оозунан жаңылып жыгылат.

¹¹Адил адамдын оозу – өмүр булагы, ал эми мыйзамсыздардын оозу зулумдукту жаап-жашырат.

¹²Жек көрүү жаңжал чыгарат, ал эми сүйүү бардык күнөөнү жабат.

¹³Акылдуунун оозунда акыл бар, ал эми акылсыздын денесинен таяк кетпейт.

¹⁴Акылдуулар билимди сакташат, акылсыздардын оозу – тез келүүчү өлүм.

¹⁵Байдын мүлкү – өзүнө чептүү шаар, жакырлардын кайгысы – өздөрүнүн начар турмушу.

¹⁶Адил адамдын эмгеги өмүргө ээ кылат, мыйзамсыздын ийгилиги күнөөгө алып барат.

¹⁷Акыл-насаатты сактаган адам өмүр жолунда, акыл-насааттан баш тарткан адам адашып жүрөт.

¹⁸Жек көрүүсүн жашырган адамдын оозу жалган. Ушак тараткан адам – акылсыз адам.

¹⁹Көп сүйлөгөн адам күнөөгө батпай койбойт. Тилин тыйган адам – акылдуу адам.

²⁰Адил адамдын тили – тандамал күмүш, мыйзамсыздын жүрөгү эч нерсеге арзыбайт.

²¹Адил адамдын сөзү көптү багат, акылсыздар акыл жетишпегенден өлүшөт.

²²Теңирдин батасы байытат, өзү менен кошо кайгы алып келбейт.

²³Акылсыз адамга кылмыш кылуу – оюн-тамаша, ал эми акылдуу адамга акыл таандык.

²⁴Мыйзамсыз эмнеден корксо, анын башына ошол түшөт, ал эми адил адамдын тилеги аткарылат.

²⁵Мыйзамсыз адам куюн учургандай жок болот, ал эми адил адам түбөлүк негизде турат.

²⁶Тишке уксус кандай болсо, көзгө түтүн кандай болсо, жалкоону жумшаган адамга жалкоо да ошондой.

²⁷Кудайдан коркуу өмүрдү узартат, ал эми мыйзамсыздардын өмүрү кыскарат.

²⁸Адил адамдарды кубаныч күтүп турат, мыйзамсыздардын үмүтү таш кабат.

²⁹Теңирдин жолу – кемчиликсиз адамдар үчүн чеп, мыйзамсыздар үчүн коркунуч.

³⁰Адил адам түбөлүккө олку-солку болбойт, мыйзамсыздар болсо жер үстүндө калышпайт.

³¹Адил адамдын оозунан акылдуу сөз чыгат, ал эми алдамчы тил кесилет.

³²Адил адам орундуу сүйлөгөндү билет, ал эми мыйзамсыздын оозунан ыпылас сөз чыгат.