Read Кыргыз тилиндеги Библия, 2004 Накыл 11 Bible Online

Накыл 11 - Кыргыз тилиндеги Библия, 2004 bible

Накыл 11

¹Туура эмес тараза Теңирдин алдында жийиркеничтүү, туура тараза Ага жагат.

²Текебердик келгенде, маскаралык да келет, ал эми момундарда акылмандык.

³Куулугу жок адамдарды чынчылдыгы жетектейт, ал эми жүзү караларды амалкөйлүгү өлтүрөт.

⁴Каар төгүлө турган күнү байлык жардам бербейт, ал эми адилдик өлүмдөн куткарат.

⁵Кемчиликсиз адамдын жолун өзүнүн адилдиги түздөйт, ал эми мыйзамсыз адам өзүнүн мыйзамсыздыгынын айынан кулайт.

⁶Куулугу жок адамдарды өздөрүнүн адилдиги куткарат, ал эми мыйзамсыздар өздөрүнүн мыйзамсыздыгы менен торго түшүшөт.

⁷Күнөөкөр адамдын үмүтү өзү менен кошо жоголот, мыйзамсыздардын үмүтү жок болот.

⁸Адил адам кырсыктан кутулат, анын ордуна мыйзамсыз тутулат.

⁹Эки жүздүү өз жакынын тили менен өлтүрөт, ал эми адил адамдар кыраакылыгы менен кутулушат.

¹⁰Адил адамдар жакшы жашап жатканда, шаар кубанат; мыйзамсыз адамдар өлгөндө, майрам болот.

¹¹Адил адамдардын батасы менен шаар гүлдөйт, ал эми мыйзамсыздардын тили менен шаар талкаланат.

¹²Кем акыл жакынына жек көрөрүн айтат, ал эми акылдуу адам унчукпайт.

¹³Сөз ташыган адам жашыруун сырды ачат, ал эми ишенимдүү киши ичинде сактайт.

¹⁴Туура кеңештин жоктугунан элдин абалы начарлайт, кеңешчилер көп болсо, эл куткарылат.

¹⁵Бирөөнүн милдетин мойнуна алган адам өзүнө өзү жамандык кылат, ал эми кепилдикти жек көргөн адам коопсуз болот.

¹⁶Адептүү аял даңкка ээ болот, ал эми эмгекти сүйгөндөр байлыкка ээ болушат.

¹⁷Кайрымдуу адам өз жанына жакшылык кылат, ал эми таш боор адам өз денесин кыйратат.

¹⁸Мыйзамсыз адам жалган жол менен пайда табат, ал эми чындыкты сепкен адам чыныгы белек алат.

¹⁹Адилдик өмүргө ээ кылат, ал эми жамандыкка умтулган адам өлүмгө умтулат.

²⁰Жүрөгү бузук адамдар Теңирдин алдында жийиркеничтүү, ал эми кемчиликсиз жашагандар Ага жагат.

²¹Бузуку адам жазаланбай калбайт деп, кепилге өтүүгө болот, ал эми адил адамдардын тукуму куткарылат.

²²Сулуу, бирок акылсыз аял мурдуна алтын шакек тагылган чочкодой.

²³Адил адамдардын каалаганы – жалаң жакшылык, мыйзамсыздарды каар күтүп турат.

²⁴Бирөө мол себет, аныкына дагы кошулат; экинчи бирөө ашкере үнөмчүл, ошого карабастан жакырдана берет.

²⁵Кайрымдуу жан ток болот. Бирөөнүн суусунун кандырган адамдын да суусуну кандырылат.

²⁶Данды кампасына катып алган адам элдин каргышына калат, ал эми саткан адамдын үстүндө бата болот.

²⁷Жакшылыкка умтулган адам жакшылык табат, жамандык издеген адамга жамандык келет.

²⁸Байлыгына таянган адам кулайт, ал эми адил адамдар жалбырактай көгөрүшөт.

²⁹Yйүн бузган адам энчисине шамал алат, акылсыз адам жүрөгү акылдуу адамга кул болот.

³⁰Адил адамдын жемиши – өмүр дарагы, акылдуу адам адамдарды өзүнө тартат.

³¹Ошентип, адил адамга жер үстүндө өз тиешеси берилсе, андан бетер мыйзамсызга да, күнөөкөргө да өз тиешеси берилет.