Read Кыргыз тилиндеги Библия, 2004 Накыл 13 Bible Online

Накыл 13 - Кыргыз тилиндеги Библия, 2004 bible

Накыл 13

¹Акылдуу уул атасынын акыл-насаатын угат, ал эми ээ-жаа бербеген уул айыбын ачкандарды укпайт.

²Адам өз оозунун жемишинен жакшылык көрөт, ал эми мыйзамды бузгандардын жаны жамандык көрөт.

³Тилин тыйган адам жанын сактайт, ал эми оозун чоң ачкан адам кыйынчылыкка дуушар болот.

⁴Жалкоо эңсейт, бирок эңсегени бекер, ал эми аракетчил адамдар тоюшат.

⁵Адил адам жалган сөздү жек көрөт, ал эми мыйзамсыз адам өз абийирин өзү төгүп, өзүн өзү маскара кылат.

⁶Кемчиликсиз адамды чындык сактайт, ал эми күнөөкөрдү мыйзамсыздыгы өлтүрөт.

⁷Бирөө эч нерсеси жок болсо да, өзүн бай көрсөтөт. Экинчи бирөө байлыгы ашып-ташып турса да, өзүн бечара көрсөтөт.

⁸Адам байлыгы менен өз өмүрүн сатып алат, ал эми жардыны эч ким коркутпайт.

⁹Адил адамдардын жарыгы жаркырап турат, мыйзамсыздардын чырагы болсо өчөт.

¹⁰Менменсинүүдөн чыр чыгат, ал эми кеңешкендерде акыл бар.

¹¹Оңой жол менен табылган байлык тез жок болот, ал эми мээнет менен жыйнаган адам байлыгын арттырат.

¹²Көпкө чейин ишке ашпаган үмүт жүрөктү кыйнайт, ал эми ишке ашкан үмүт – өмүр дарагы.

¹³Кудайдын сөзүн этибар албаган адам өзүнө зыян келтирет, ал эми осуяттан корккон адам тиешесин алат.

¹⁴Акылдуунун окутуусу – өлүмдүн торунан сактап кала турган өмүр булагы.

¹⁵Жакшы акыл жакшы нерсеге жеткирет, ал эми мыйзамсыздардын жолу катаал.

¹⁶Ар бир эстүү адам акыл менен иш кылат, ал эми акылсыз адам өзүнүн акылсыздыгын көрсөтөт.

¹⁷Жаман элчи кырсыкка кабылат, ал эми ишенимдүү элчи куткарат.

¹⁸Үйрөнүүдөн баш тарткан адамды жакырлык менен маскарачылык күтүп турат, ал эми акыл-насаатты сактаган адам урматка ээ болот.

¹⁹Ишке ашкан тилек жанга жагымдуу, ал эми жамандыктан четтөө – акылсыздар үчүн чыдагыс нерсе.

²⁰Акылдуу адамдар менен мамилелешкен адам акылдуу болот, ал эми акылсыз адамдар менен достошкон адам бузулат.

²¹Күнөөкөрлөрдү жамандык ээрчип жүрөт, ал эми адил адамдар жакшылык көрүшөт.

²²Жакшы адам неберелерине да мурас калтырат, ал эми күнөөкөрдүн байлыгы адил адам үчүн сакталат.

²³Жардылардын талаасында да мол түшүм болот, бирок кээ бир адамдар баш аламандыктан өлүп жатышат.

²⁴Чыбык аяган адам уулун жек көрөт, ал эми уулун сүйгөн адам аны бала чагынан жазалайт.

²⁵Адил адам тамакты тойгончо жейт, ал эми мыйзамсыз адамдардын карды ач болот.