Read Кыргыз тилиндеги Библия, 2004 Накыл 14 Bible Online

Накыл 14 - Кыргыз тилиндеги Библия, 2004 bible

Накыл 14

¹Акылдуу аял үйүн курат, ал эми акылы жок аял аны өз колу менен бузат.

²Түз жол менен бара жаткандар Теңирден коркушат, ал эми кимдин жолу түз эмес болсо, ал Теңирди тоотпойт.

³Акылсыздын тили – текебердиктин камчысы, ал эми акылдууларды тили сактайт.

⁴Бука жок жерде акыр бош, ал эми мол киреше букалардын күчүнөн.

⁵Ишенимдүү күбө калп айтпайт, ал эми жалган күбө көп жалаа жабат.

⁶Шылдыңчыл адам акылмандыкты издейт, бирок таба албайт, ал эми акылдуу адамга билим алуу оңой.

⁷Акылсыз адамдан кач, анын оозунан акылдуу сөз чыкпайт.

⁸Акылдуу адамдын акылдуулугу – өз жолун билгендиги, акылсыз адамдардын акылсыздыгы болсо – адашуу.

⁹Акылсыз адамдар күнөөгө күлүшөт, ал эми адил адамдардын арасында ынтымак.

¹⁰Жүрөк өз жанынын кайгысын билет, анын кубанычын бөлөк бирөө бөлүшө албайт.

¹¹Мыйзамсыздардын үйү бүлгүнгө учурайт, ал эми адил адамдардын үйү гүлдөйт.

¹²Адамга түз көрүнгөн жолдор бар, бирок алардын акыры – өлүмгө алып баруучу жол.

¹³Күлүп жаткан адамдын да жүрөгү ооруйт, кээде кубанычтын аягы кайгы менен бүтөт.

¹⁴Жүрөгү бузук адам өз жолунун жемишине тоёт, жүрөгү таза адам да өз жолунун жемишине тоёт.

¹⁵Акылсыз адам ар бир сөзгө ишене берет, ал эми акылдуу адам өз жолун байкап жүрөт.

¹⁶Акылдуу адам Кудайдан коркуп, жамандыктан качат, ал эми акылсыз адам ачуулуу, өзүнө өзү ишенген адам болот.

¹⁷Ачуусу чукул адам акылсыздык кылышы мүмкүн, ал эми атайылап кыянаттык кылган адам жек көрүндү болот.

¹⁸Түркөй адамдар энчисине акылсыздыкты алышат, ал эми акылдуу адамдар билим менен сыйланышат.

¹⁹Кара ниет адамдар ак ниет адамдарга, мыйзамсыз адамдар адил адамдардын дарбазасынын алдында таазим кылышат.

²⁰Жакыр өз жакындарына да жек көрүндү болот, ал эми бай кишинин достору көп.

²¹Өз жакынын жек көрүп жаткан адам күнөө кылып жатат, ал эми жакырга кайрымдуу болгон адам бактылуу.

²²Жамандык кылууну ойлоп жаткандар адашып жатышкан жокпу? Ал эми жакшылык кылууну ойлогон адамдарда ырайым, ишеним бар.

²³Ар бир эмгектен киреше кирет, ал эми маңызсыз сөз зыянга гана учуратат.

²⁴Акылдуу адамдардын таажысы – өздөрүнүн байлыгы, ал эми түркөй адамдардын таажысы – өздөрүнүн акылсыздыгы.

²⁵Ишенимдүү күбө адамдарды куткарат, ал эми жалган күбө жалаа жабат.

²⁶Теңирден коркуу – бекем таяныч, Ал – Өз уулдарына баш паана.

²⁷Теңирден коркуу – өмүр булагы, ал өлүм торунан сактайт.

²⁸Эли көп падыша – улуу падыша, эли аз падыша – шордуу падыша.

²⁹Сабырдуу адамдын акылы мол, ал эми ачуусу чукул адам өзүнүн акылсыздыгын көрсөтөт.

³⁰Момун жүрөк – денеге өмүр, ал эми көрө албастык – сөөккө ириң.

³¹Жакырды кордогон адам анын Жаратканына акарат келтирет, ал эми Аны урматтаган адам муктаж болуп турган адамга жакшылык кылат.

³²Мыйзамсыз адам кылган жамандыгы үчүн четке кагылат, ал эми адил адамдын өлүм алдында да үмүтү бар.

³³Акылмандык акылдуунун жүрөгүндө жашайт, акылсыздар арасында ал өзү жөнүндө билдирип турат.

³⁴Адилдик элдин даңкын чыгарат, ал эми мыйзамсыздык элдин абийирин төгөт.

³⁵Падыша акылдуу кулга ырайым кылат, ал эми аны уят кылган адамга каарын чачат.