Read Кыргыз тилиндеги Библия, 2004 Накыл 15 Bible Online

Накыл 15 - Кыргыз тилиндеги Библия, 2004 bible

Накыл 15

¹Момундук менен айтылган жооп каарды токтотот, ал эми кордогон сөз ачууну козгойт.

²Акылдуу адамдардын тили билимди кабарлайт, ал эми акылсыздардын оозу акылсыздыкты сүйлөйт.

³Теңирдин көзү бардык жерде, ал жакшыларды да, жамандарды да көрүп турат.

⁴Момун тил – өмүр дарагы, ал эми ооздукталбаган тил рухту талкалайт.

⁵Акылсыз адам атасынын акыл-насаатын барктабайт, ал эми айыбын ачканды уккан адам акылдуу.

⁶Адил адамдын үйүндө байлык көп, ал эми мыйзамсыздын кирешеси өзүнө бүлүнүү алып келет.

⁷Акылдуу адамдардын оозу билим таратат, акылсыздардын жүрөгү андай эмес.

⁸Мыйзамсыздардын курмандыгы Теңирдин алдында жийиркеничтүү, ал эми адил адамдардын сыйынуусу Ага жагат.

⁹Мыйзамсыздын жолу Теңирдин алдында жийиркеничтүү, ал эми акыйкат жолу менен жүргөн адамды Ал жакшы көрөт.

¹⁰Түз жолдон чыккандар катуу жазаланат, айыбын ачкан адамды жек көргөн адам өлөт.

¹¹Өлгөндөр жаткан жай менен Абадон Теңирдин алдында ачык, андан бетер адам баласынын жүрөгү Анын алдында ачык.

¹²Шылдыңчыл адам айыбын ашкере кылган адамдарды сүйбөйт, акылдуу адамдарга да барбайт.

¹³Жүрөктөгү кубаныч жүздү жайдары кылат, ал эми жүрөктөгү кайгы көңүлдү чөгөрөт.

¹⁴Акылдуунун жүрөгү билим издейт, ал эми акылсыздардын оозу акылсыздык менен тамактанат.

¹⁵Бактысыздын бардык күндөрү кайгылуу, ал эми жайдары адамда күндө той.

¹⁶Бай болуп тынчсызданып жашаганча, кедей болуп Теңирден коркуп жашаган жакшы.

¹⁷Жек көрүү бар жерде семиз буканын этин жегенге караганда, сүйүү бар жерде жашылчадан жасалган тамак жеген жакшы.

¹⁸Ачуусу чукул адам чатак чыгарат, ал эми сабырдуу адам чатакты басат.

¹⁹Жалкоонун жолу – тикенектүү чырмоок, ал эми адил адамдардын жолу тегиз.

²⁰Акылдуу уул атасын кубантат, акылсыз уул энесин барктабайт.

²¹Акылсыздык – кем акыл адам үчүн кубаныч, ал эми акылдуу адам түз жол менен жүрөт.

²²Кеңешпей кылган иштер бузулат, кеңешчилер көп болсо, алар ишке ашат.

²³Адам берген туура жообунан кубаныч алат, ошондой эле өз убагында айтылган сөз кандай жакшы!

²⁴Төмөн жактагы өлгөндөр жаткан жайга түшпөс үчүн, акылмандын өмүр жолу жогору кетет.

²⁵Теңир менменсингендердин үйүн кыйратат, ал эми жесирдин чегин бекемдейт.

²⁶Кара ниеттердин ойлору Теңирдин алдында жийиркеничтүү, ал эми кемчиликсиз адамдардын сөздөрү Теңирге жагат.

²⁷Алдым-жуттум адам өз үйүн бүлдүрөт, ал эми параны жек көргөн адам жашайт.

²⁸Адил адамдын жүрөгү ойлонуп жооп берет, ал эми мыйзамсыздардын оозунан жаман сөз чыгат.

²⁹Теңир мыйзамсыздардан алыс, ал эми адил адамдардын сыйынуусун угат.

³⁰Жарык жүз жүрөктү кубантат, жакшы кабар сөөктү агартат.

³¹Турмуш сабактарын кунт коюп уккан адам акылдуу адамдардын арасында болот.

³²Акыл-насаатты четке каккан адам өз жанына кайдыгер, ал эми сынга кулак салган адам акылга ээ болот.

³³Теңирден коркуу акылдуу кылат, моюн сунуудан кийин даңк келет.