Read Кыргыз тилиндеги Библия, 2004 Накыл 16 Bible Online

Накыл 16 - Кыргыз тилиндеги Библия, 2004 bible

Накыл 16

¹Адам жүрөгүндө бир нерсени ниет кылат, бирок анын жообу Теңирден болот.

²Адамга өзүнүн бардык жолдору таза көрүнөт, бирок жүрөктөрдү Теңир салмактайт.

³Иштериңди Теңирге тапшыр, ошондо ойлогон ойлоруң ишке ашат.

⁴Бардыгын Теңир Өзү үчүн жаратты. Атүгүл, мыйзамсызды кайгы күнгө сактап турат.

⁵Жүрөгү текебер адам Теңирдин алдында жийиркеничтүү, ал жазасыз калбайт деп, кепилге өтсө болот.

⁶Ырайым жана чындык менен күнөө тазаланат, Теңирден коркуу жамандыктан алыстатат.

⁷Адамдын жолдору Теңирге жакканда, Ал аны душмандары менен да элдештирет.

⁸Алдамчылык менен мол киреше тапканча, чындык менен аз киреше тапкан артык.

⁹Адамдын жүрөгү өз жолун ойлонуштурат, бирок анын кадамын Теңир багыттайт.

¹⁰Падышанын оозунан Кудайдын өкүмү чыгат, сотто анын оозу күнөө кылбайт.

¹¹Туура тараза жана өлчөөчү идиштер Теңирден, баштыктагы бардык тараза таштар да Теңирден.

¹²Мыйзамсыз иш падышалар үчүн жийиркеничтүү, анткени такты чындык менен бекемделет.

¹³Чын сүйлөгөн ооз падышага жагат, ал чындыкты сүйлөгөн адамды жакшы көрөт.

¹⁴Падышанын каары – өлүмдүн кабарчысы, бирок акылдуу адам анын каарын кайттырат.

¹⁵Падышанын жарык жүзү – өмүр, анын ырайым кылганы жазгы жамгырдай.

¹⁶Даанышмандыкка ээ болуу алтынга ээ болуудан алда канча жакшы, акылмандыкка ээ болуу тандамал күмүшкө ээ болуудан жакшы.

¹⁷Адил адамдардын жолу – жамандыктан оолак болуу. Өз жолун сактаган адам өз жанын сактайт.

¹⁸Кыйроонун алдында текебердик келет, кулардын алдында менменсингендик келет.

¹⁹Текеберлер менен олжо бөлүшкөнчө, момундар менен бирге моюн сунган жакшы.

²⁰Ишти акылдуулук менен жүргүзгөн адам ийгилик табат, Теңирге таянган адам бактылуу.

²¹Жүрөгү акылдуу адам акылдуу деп аталат, жагымдуу сөз акылга акыл кошот.

²²Акылы бар адам үчүн акыл – өмүрдүн булагы, ал эми акылсыздардын илимпоздугу – акылсыздык.

²³Акылдуу адамдын жүрөгү өз тилин акылдуу кылат, оозундагы билимин арттырат.

²⁴Жагымдуу сөз – бал, ал – жанга жагымдуу, сөөккө дары.

²⁵Адамга түз көрүнгөн жолдор бар, бирок алардын аягы – өлүмгө алып баруучу жол.

²⁶Эмгекчи өзү үчүн эмгектенет, анткени эмгектенүүгө оозу мажбурлап жатат.

²⁷Амалкөй адам жамандык ойлоп турат, анын оозунан куйкалоочу от чыгат.

²⁸Эки жүздүү адам чыр-чатак себет, ушакчы адам досторду ажыратат.

²⁹Жакшылык ойлобогон адам өз жакынын бузуп, жаман жолго түртөт.

³⁰Ал кыянаттык ойлоп табыш үчүн, көзүн жүлжүйтөт, эриндерин тиштеп, кыянаттык кылат.

³¹Даңктын таажысы – чындык жолунда жүргөн ак чач.

³²Көпкө чыдаган адам эр жүрөк адамдан артык, өзүн кармай билген адам шаарды басып алган адамдан артык.

³³Өкчөмө таш жерге ыргытылат, бирок анын бардык чечими Теңирден болот.