Read Кыргыз тилиндеги Библия, 2004 Накыл 17 Bible Online

Накыл 17 - Кыргыз тилиндеги Библия, 2004 bible

Накыл 17

¹Уруш-талаш кетпеген үйдөгү толо эттен тынч жашаган үйдөгү бир сындырым каткан нан артык.

²Акылдуу кул мырзасынын бузулган уулуна бийлик кылат, анын бир туугандары менен кошо мураска ээ болот.

³Эритүүчү меш күмүш үчүн, көрүктүн очогу алтын үчүн, ал эми жүрөктөрдү Теңир сынайт.

⁴Бузуку адам мыйзамсыздын сөзүн угат, алдамчы адам кыянатчы адамдын тилин алат.

⁵Жакырды тилдеген адам анын Жаратканына акарат келтирген болот. Бирөөнүн башына мүшкүл түшкөнүнө кубанган адам жазасыз калбайт.

⁶Карылардын таажысы – балдарынын балдары, балдардын даңкы – ата-энелери.

⁷Акылсыз адамга маанилүү сөз жарашпайт, атактуу адамга калп айткан жарашпайт.

⁸Пара – берчү киши үчүн асыл таш, ал каякка кайрылса да үлгүрөт.

⁹Айыпты жаап койгон адам сүйүү издейт, ал эми аны кайра эскерткен адам досун алыстатат.

¹⁰Акылсыз адамга жүз балак таасир эткенге караганда, акылдуу адамга сөгүш катуу таасир этет.

¹¹Жаңжалчыл жамандык гана издейт, ошондуктан ага каршы ырайымсыз периште жөнөтүлөт.

¹²Акылсыз адамга кезиккиче, мамалактарынан ажыраган аюуга кезиккен жакшы.

¹³Жакшылыкка жамандык менен жооп берген адамдын үйүнөн жамандык кетпейт.

¹⁴Чатактын башталышы жарып кирген суудай. Чатакты күчөп кете электе токтот.

¹⁵Мыйзамсыз адамды актаган адам да, адил адамды каралаган адам да Теңирдин алдында жийиркеничтүү.

¹⁶Акылсыздын колундагы байлыктын баркы жок. Даанышмандыкка жетүүгө анын акылы жок.

¹⁷Дос ар дайым сүйөт, башыңа иш түшкөндө, ал бир тууганыңдай болуп келет.

¹⁸Кем акыл адам колун берип, өз жакынына кепилдикке өтөт.

¹⁹Чатакты жакшы көргөн адам күнөөнү жакшы көрөт. Дарбазасын бийик көтөргөн адам – жыгылууну издеген адам.

²⁰Анткор жүрөк жакшылык көрбөйт, амалкөй тил кырсыкка кабылат.

²¹Акылсызды төрөгөн адам башына балаа үйдү, акылсыздын атасы да кубаныч көрбөйт.

²²Шайыр жүрөк даба болчу дарыдай жакшы таасир берет, кайгылуу рух сөөктү кургатат.

²³Акыйкаттыктын жолун бурмалаш үчүн, мыйзамсыз адам жең ичинен пара алат.

²⁴Даанышмандык акылдуу адамдын көз алдында, ал эми акылсыздын көзү жердин түбүндө.

²⁵Акылсыз уул – атасынын шору, энесинин кайгысы.

²⁶Айыбы жокту айыптаган, чындык үчүн мырзаларды таяктаган жакшы эмес.

²⁷Акылдуу адам токтоолук менен сүйлөйт, акыл-эстүү адам сабырдуу болот.

²⁸Акылсыз адам унчукпай турганда акылдуу адам болуп көрүнүшү мүмкүн, ооз ачпаган адам акыл-эстүү адам болуп көрүнүшү мүмкүн.