Read Кыргыз тилиндеги Библия, 2004 Накыл 19 Bible Online

Накыл 19 - Кыргыз тилиндеги Библия, 2004 bible

Накыл 19

¹Жалган сүйлөгөн, анан калса, акылсыз байга караганда такыбаа жашаган кембагал артык.

²Билимсиз болуу жакшы эмес, шашкан адам мүдүрүлөт.

³Акылсыздыгы адамды жолунан адаштырат, жүрөгү болсо Теңирге кыжырданат.

⁴Байлык досту көбөйтөт, ал эми жакырды досу да таштап кетет.

⁵Жалган күбө жазасыз калбайт, калп айткан адам качып кутулбайт.

⁶Адамдардын көбү атактууларга кошомат кылат, белек берген адамга баары дос.

⁷Жакыр адамды өзүнүн бүт бир туугандары жек көрөт, достору андан бетер андан качышат, алар менен сүйлөшөйүн деп, ал алардын артынан чуркайт, бирок сүйлөшө албайт.

⁸Акылга жеткен адам өз жанын сүйөт, акыл-эсти сактаган адам бакыт табат.

⁹Жалган күбө жазасыз калбайт, жалган айткан адам өлөт.

¹⁰Акылсыз адамга сөөлөт жарашпайт, андан бетер кулга төрөлөргө бийлик кылуу жарашпайт.

¹¹Акыл-эстүү адам ачууга алдырбайт, бирөөнүн кылмышын кечирип коюу – ал үчүн даңк.

¹²Падышанын ачуусу арстандын айкырыгындай, ал эми ырайымы чөптүн үстүндөгү шүүдүрүмдөй.

¹³Акылсыз уул – өз атасына кайгы, ажаан аял – тынымсыз тамчылаган суу.

¹⁴Yй менен мал-мүлк – ата-энеден калган мурас, ал эми акылдуу аял – Теңирден.

¹⁵Эринчээктик уйкуга чөмүлтөт, шалаакы адам ачка калат.

¹⁶Мыйзамды сактаган адам өз жанын сактайт, ал эми өз жолуна кайдыгер адам өлөт.

¹⁷Жакырга жакшылык кылган адам Теңирге насыя берет, кылган жакшылыгын Теңир кайтарымсыз калтырбайт.

¹⁸Yмүтүң барда уулуңду жазала, анын ыйына көңүл бөлбөй эле кой.

¹⁹Ачуулуу адам жазасын алсын, аяп койсоң, андан көбүрөөк жазалоого туура келет.

²⁰Акылдуу болом десең, кеңешти ук, айыбыңды ачса, кабыл ал.

²¹Адам жүрөгүндө көп нерсени ниет кылат, бирок Теңирдин белгилеп койгону гана ишке ашат.

²²Кайрымдуулугу адамга кубаныч алып келет. Калпычы адамга караганда жарды адам артык.

²³Теңирден коркуу өмүргө алып барат, Теңирден корккон адам дайыма ыраазы болот, анын башына жамандык келбейт.

²⁴Эринчээк адам колун чөйчөккө салат да, аны оозуна жеткиргиси келбейт.

²⁵Шылдыңчыл адамды жазаласаң, жөнөкөй адам да эстүү болуп калат. Акылдуу адамдын айыбын ачсаң, ал акыл-насаатты түшүнөт.

²⁶Абийири жок, уятсыз уул атасынын мүлкүн чачып, энесин үйдөн кууп чыгат.

²⁷Уулум, насаат сөздөн четтөөнү үгүттөгөндөрдү укканыңды токтот!

²⁸Жалган күбө акыйкаттыкты шылдың кылат, мыйзамсыз адамдардын оозу жалганды жутат.

²⁹Шылдыңчыл адамдарга жаза, акылсыз адамдарга токмок даяр.