Read Кыргыз тилиндеги Библия, 2004 Накыл 2 Bible Online

Накыл 2 - Кыргыз тилиндеги Библия, 2004 bible

Накыл 2

¹Уулум! Эгерде менин сөздөрүмдү кабыл алсаң, менин акыл-насааттарымды сактасаң,

²кулагыңды акылмандыкка төшөсөң, жүрөгүңдү ой жүгүртүүгө бурсаң,

³билимди чакырсаң, акылга кайрылсаң,

⁴аны күмүш менен кенчти издегендей издесең,

⁵Теңирден коркуу деген эмне экенин түшүнөсүң, Кудай жөнүндөгү билимге жетесиң.

⁶Анткени акылмандыкты Теңир берет. Анын оозунан билим менен акыл чыгат.

⁷Ал адил адамдар үчүн куткарылуу сактайт. Ал – түз жүргөндөрдүн калканычы.

⁸Ал акыйкаттыктын жолдорун сактайт, Ал Өз ыйыктарынын жолун коргойт.

⁹Ошондо сен жакшылыкка алып бара турган жолдорду: чындыкты, адилеттикти, чынчылдыкты түшүнөсүң.

¹⁰Акылмандык жүрөгүңө киргенде, билим жаныңа жакканда,

¹¹сени эстүүлүк сактап жүрөт, акыл кайтарып жүрөт,

¹²жаман жолдон, жалган айткан адамдан сактайт,

¹³караңгылыктын жолунда жүрүш үчүн түз жолду таштагандардан,

¹⁴жамандык жасап кубангандардан, бузукулук кылып жыргагандардан,

¹⁵жаман жолдо бара жаткандардан, адашып жүргөндөрдөн,

¹⁶башка бирөөнүн аялынан, жылуу сүйлөгөн бөтөн аялдан сактайт.

¹⁷Ал аял жаш чагындагы жолдошун таштаган, Кудайдын келишимин унуткан.

¹⁸Анын үйү өлүмгө жетелейт, анын жолу өлгөндөргө алып барат.

¹⁹Анын үйүнө киргендердин бири да кайрылып келбейт, өмүрдүн жолуна түшпөйт.

²⁰Андыктан ак ниеттүүлөрдүн жолу менен жүр, адил адамдардын жолун жолдо.

²¹Анткени жерде адил адамдар жашашат, жерде бузулбаган ак ниет адамдар өмүр сүрүшөт.

²²Мыйзамсыздар болсо жер үстүнөн жок кылынышат, ишенимсиздер жер үстүнөн тукум курут болушат.