Read Кыргыз тилиндеги Библия, 2004 Накыл 20 Bible Online

Накыл 20 - Кыргыз тилиндеги Библия, 2004 bible

Накыл 20

¹Шарап адамды шылдың кылат, күчтүү ичкилик адамды оолуктурат, буларга берилгендердин баары акылсыз.

²Падышанын каары арстандын айкырыгындай, аны каарданткан адам өзүнө каршы күнөө кылат.

³Чыр-чатактан качуу – адам үчүн абийир, ал эми акылсыз адам жаңжалчыл болот.

⁴Жалкоо адам кышында жер айдабайт, оруу-жыюу маалында издеп, эч нерсе таппайт.

⁵Адамдын жүрөгүндөгү ойлор – терең суулар, бирок акылдуу адам алардан сузуп ала берет.

⁶Көптөр адамды ырайымдуулугу үчүн макташат, бирок чынчыл адамды ким табат?

⁷Адил адам түз жүрөт, анын артында калган балдары бактылуу!

⁸Сот тагында отурган падыша көз карашы менен бардык жамандыкты кубалайт.

⁹«Мен жүрөгүмдү тазаладым, мен күнөөмдөн тазамын», – деп, ким айта алат?

¹⁰ Бирдей эмес тараза, бирдей эмес чен-өлчөм Теңирдин алдында жийиркеничтүү.

¹¹Өспүрүмдүн жүрүм-турумунун туура же туура эмес экенин кылган ишинен билип алууга болот.

¹²Уккан кулакты, көргөн көздү Теңир жараткан.

¹³Жакыр болбошуң үчүн, уктаганды жакшы көрбө. Көзүңдү ачып сергек бол, ошондо нанды тойгуча жейсиң.

¹⁴Сатып алуучу: «Жаман, жаман», – дейт, бирок мындай басканда: «Жакшы, жакшы», – деп мактанат.

¹⁵Алтын да, көп бермет да бар, бирок акылдуу сүйлөгөн ооз алардан кымбат.

¹⁶Бирөөгө кепил болгон адамдын көйнөгүн алып кал, чоочун бирөө үчүн кепил болгон адамдан күрөө ал.

¹⁷Алдамчылык менен табылган нан таттуу, бирок жегенден кийин, ооз шагылга толот.

¹⁸Ой-максат кеңеш аркылуу бекемделет, кеңешип алып согуш жүргүз.

¹⁹Сөз ташыган адам бирөөнүн сырын ачат. Оозун чоң ачкан адам менен байланышпа.

²⁰Атасы менен энесине тил тийгизген адамдын чырагы коюу караңгылыкта өчөт.

²¹ Шашылыш тартылып алынган мурас бата алып келбейт.

²²«Жамандык үчүн өч алам», – дебе, Теңирге кой, ошондо Ал сени сактайт.

²³Туура эмес тараза таштары Теңирдин алдында жийиркеничтүү, туура эмес таразалар жакшы эмес.

²⁴Адамдын кадамын Теңир багыттайт, ошондуктан адам өз жолун кантип биле алат?

²⁵Шашып убада берип коюп, андан кийин ойлонуу – адамга тузак.

²⁶Акылдуу падыша мыйзамсыздарды сапырат, аларды дөңгөлөк астында калтырат.

²⁷Адамдын руху – Теңирдин чырагы, ал адамдын жүрөгүнүн тереңин сынайт.

²⁸Падышаны кайрымдуулук менен акыйкаттык сактап турат, ал өз тагын ырайымы менен кармап турат.

²⁹Жаштардын атак-даңкы – алардын күчү, ал эми карылардын сөөлөтү – алардын ак чачы.

³⁰Таяктан алган жараат – кыянаттыкка каршы даба, ичти аралап өткөн соккулар – жамандыкка каршы даба.