Read Кыргыз тилиндеги Библия, 2004 Накыл 21 Bible Online

Накыл 21 - Кыргыз тилиндеги Библия, 2004 bible

Накыл 21

¹Падышанын жүрөгү Теңирдин колунда: Ал аны агын суудай, каалаган жагына бурат.

²Адамдын бардык жолу өзүнө түз көрүнөт, бирок жүрөктү Теңир салмактайт.

³Курмандык чалганга караганда, акыйкаттык менен чындыкты сактоо Теңирге көбүрөөк жагат.

⁴Мыйзамсыздарды айырмалап турган текебер көз менен менменсинген жүрөк – күнөө.

⁵Аракетчил кишинин ойлору молчулукка умтулат, ал эми ар бир шашма адам зыян тартат.

⁶Жалган тил менен тапкан байлык – бат тараган буу, андай байлыкка умтулгандар өздөрүнө өлүм издешет.

⁷Мыйзамсыздардын зордук-зомбулугу өздөрүнүн башына түшөт, анткени алар акыйкаттыкты сактоодон баш тартышты.

⁸Бузулган адам терс жолдо жүрөт, ал эми таза адам туура иш кылат.

⁹Ажаан аял менен заңгыраган үйдө жашаганча, үйдүн чатырынын бир бурчунда жашаган артык.

¹⁰Мыйзамсыздын жаны кыянаттыкты жакшы көрөт, ал өз досуна да ырайым кылбайт.

¹¹Шылдыңчыл адам жазаланганда, жөнөкөй адам акылдуу болуп калат; акылдуу адам насаат укканда, билими дагы көбөйөт.

¹²Адил адам мыйзамсыздын үйүн карап, анын жамандыкка кабылганын көрөт.

¹³Жакырдын ыйын укпай, кулагын жаап алган адам өзү да ыйлайт, бирок аны эч ким укпайт.

¹⁴Жашыруун берилген белек ачууну басат, жең ичинен берилген тартуу катуу каарды кайт кылат.

¹⁵Акыйкаттыкты сактоо – адил адам үчүн кубаныч, кыянаттык кылгандар үчүн коркунуч.

¹⁶Түз жолдон чыккан адам өлгөндөргө кошулат.

¹⁷Оюн-күлкүнү жакшы көргөн адам жакырданат, ал эми шарап менен майды жакшы көргөн адам эч качан байыбайт.

¹⁸Адил адамдын кунуна мыйзамсыз адам кетет, арамдыгы жок адамдын кунуна амалкөй адам кетет.

¹⁹Ажаан, ачуулуу аял менен жашаганча, ээн талаада жашаган жакшы.

²⁰Акылдуунун үйүндө суктандырган байлык жана май болот, ал эми акылсыз аларды чачат.

²¹Акыйкаттык менен кайрымдуулукту сактаган адам өмүрдү, чындыкты, атак-даңкты табат.

²²Акылдуу адам күчтүүлөрдүн шаарына кирет да, алардын таянган чебин кулатат.

²³Оозун жана тилин тыйган адам өз жанын жамандыктан сактайт.

²⁴Текебер бузукунун аты – шылдыңчыл, ал текеберликтин күүсү менен иш кылат.

²⁵Жалкоону өзүнүн ачкөздүгү өлтүрөт, анткени анын колдору иштегиси келбейт.

²⁶Ал күн сайын аябай ачка болуп турат, адил адам болсо бере берет, бергенине өкүнбөйт.

²⁷Мыйзамсыздардын курмандыгы жийиркеничтүү, айрыкча алардын эки жүздүүлүк менен алып келгени жийиркеничтүү.

²⁸Жалган күбө өлөт, ал эми билгенин айткан адам ар дайым сүйлөйт.

²⁹Мыйзамсыз адамдын бети калың, ал эми адил адам түз жүрөт.

³⁰Теңирге каршы даанышмандык да, акылмандуулук да, акыл-кеңеш да жок.

³¹Атты согуш күнүнө карата даярдайт, бирок жеңиш Теңирден келет.