Read Кыргыз тилиндеги Библия, 2004 Накыл 22 Bible Online

Накыл 22 - Кыргыз тилиндеги Библия, 2004 bible

Накыл 22

¹Көп байлыкка караганда жакшы аттуу болгон артык; алтын менен күмүшкө караганда урматка ээ болуу артык.

²Бай менен кедей кезигишпей койбойт, экөөнү тең Теңир жараткан.

³Акылдуу адам кырсыкты көрүп жашынат, ал эми тажрыйбасыздар түз барып кырсыкка учурашат.

⁴Моюн сунуудан кийин, Теңирден коркуу, байлык, атак-даңк жана өмүр келет.

⁵Тикенек менен тузак бузукунун жолунда, ким жанын сактагысы келсе, алардан оолак болсун.

⁶Баланы башынан түз жолго сал, ошондо ал ошол жолдон карыганда да чыкпайт.

⁷Бай адам кедейге үстөмдүк кылат, карыз болгон адам карыз бергендин кулу болуп калат.

⁸Жалганды сепкен адам жамандыкты оруп алат, анын каар таягы да жок болот.

⁹Кайрымдуу адам бата алат, анткени ал жакырга өз нанынан берип жатат.

¹⁰Шылдыңчылды кууп жибер, ошондо талаш-тартыш токтойт, чыр-чатак да, уруш да басылат.

¹¹Жүрөктүн тазалыгын сүйгөн адамдын оозунан чыккан сөздөр жагымдуу, ага падыша – жолдош.

¹²Теңирдин көзү билимди сактап турат, ал эми мыйзамды бузган адамдын сөзүн Ал четке кагат.

¹³Жалкоо адам: «Көчөдө арстан жүрөт! Аянтта мени өлтүрүп коюшат!» – деп айтат.

¹⁴Бузулган аялдардын оозу – терең аң. Теңир кимге каарданса, ал ошол аңга түшөт.

¹⁵Өспүрүмдүн жүрөгүнө акылсыздык жабышса, тарбиялоочу чыбык андагы акылсыздыкты жок кылат.

¹⁶Өзүнүн байлыгын көбөйтүш үчүн, жакырды кордогон адам, ошондой эле байга бир нерсе берген адам жакырданат.

¹⁷Кулагыңды төшөп, акылдуу адамдардын сөздөрүн ук, жүрөгүңдү менин билимиме бур.

¹⁸Эгерде сен аларды жүрөгүңө сактасаң, алар оозуңда болсо, анда алар сени сооротот.

¹⁹Теңирге таянышың үчүн, мен сени бүгүн да үйрөтүп жатам, муну эсиңе тут.

²⁰Кеңештерим менен акыл-насааттарымда сага үч мертебе жазган жок белем?

²¹Сага чындыктын так сөздөрүн үйрөтүү үчүн, сени жиберген адамдарга чындыктын сөздөрүн айтып турушуң үчүн жазгам.

²²Жакырды тонобо, анткени ал жакыр. Бактысыз адамга дарбаза алдында кысым көрсөтпө.

²³Анткени алардын ишине Теңир кийлигишет, аларды талап-тоногондордун жанын алат.

²⁴Ачуулуу адам менен достошпо, ачуусу чукул адам менен байланышпа,

²⁵болбосо анын жолун үйрөнүп аласың жана өз жаныңа сыйыртмак саласың.

²⁶Ортого түшүп, карыздын милдетин алба.

²⁷Эгерде төлөй турган эч нерсең жок болсо, өзүңдү астыңдагы төшөгүңдү алдырганга чейин жеткирүүнүн кандай кажети бар?

²⁸Ата-бабаларың өткөргөн мурунку чек араны жылдырба.

²⁹Өз ишин жакшы билген адамды көрдүң беле? Ал жөнөкөй адамдардын алдында эмес, падышалардын алдында турат.