Read Кыргыз тилиндеги Библия, 2004 Накыл 23 Bible Online

Накыл 23 - Кыргыз тилиндеги Библия, 2004 bible

Накыл 23

¹Өкүмдар менен бир дасторконго отуруп калсаң, ким менен отурганыңды унутпа.

²Эгерде тамаксоо болсоң, кекиртегиңди тый.

³Анын таттуу тамактарына азгырылба, анткени ал – алдамчы тамак.

⁴Байлык жыйнаш үчүн түйшүк тартпа, мындай ойлоруңду ташта.

⁵Сен ага көзүңдү бурарың менен, ал жок болуп кетет, анткени ал өзүнө канат жасап алып, бүркүт сыяктуу асманга учуп кетет.

⁶Сараң кишинин колунан тамак жебе, анын таттуу тамактарына азгырылба.

⁷Анткени анын жүрөгүндөгү ойлору кандай болсо, өзү да ошондой, ал сага: «Ич, же», – дей берет, бирок жүрөгү сени менен эмес.

⁸Жеген бир кесимиңди кайра кусасың, жакшы сөздөрүңдү текке кетиресиң.

⁹Акылсыздын кулагына сүйлөбө, анткени ал сенин акылдуу сөздөрүңдү жек көрөт.

¹⁰Мурунку чек араны жылдырба, жетимдин талаасына кирбе.

¹¹Анткени алардын Коргоочусу күчтүү, Ал сага каршы чыгып, аларга болушат.

¹²Жүрөгүңдү билимге кой, кулагыңды акылдуу сөздөргө төшө.

¹³Баланы жазасыз калтырба, чыбык менен жазалагандан ал өлбөйт.

¹⁴Чыбык менен жазалап, жанын өлгөндөр жаткан жайдан сактап каласың.

¹⁵Уулум! Эгерде сенин жүрөгүң акылдуу болсо, анда менин жүрөгүм да кубанат.

¹⁶Сенин оозуңдан туура сөздөр чыкканда, ички дүйнөм кубанат.

¹⁷Жүрөгүң күнөөкөрлөргө көз артпасын, тескерисинче, жүрөгүң бардык күндөрдө Теңирден коркуп турсун.

¹⁸Анткени келечегиң бар, үмүтүң ишке ашат.

¹⁹Уулум, кулак сал, акылдуу бол, жүрөгүңдү түз жолго бур.

²⁰Шарап ичип мас болгондордун, этке ашыра тоюп алгандардын арасында болбо.

²¹Анткени ичкичтер менен ашыра тоюп алгандар жакырданып кетишет, уйкучулук жыртык кийим кийгизет.

²²Атаңдын тилин ал, анткени ал сенин атаң, энеңди карып калганында да жек көрбө.

²³Чындыкты сатып ал, акылмандыкты, билимди, акыл-эсти сатпа.

²⁴Адил адамдын атасы сүйүнөт, акылманды төрөгөн кубанат.

²⁵Атаң кубансын, төрөгөн энең сүйүнсүн.

²⁶Уулум! Жүрөгүңдү мага бер, көзүң менин жолдорумду карап турсун.

²⁷Анткени бузулган аял – терең аң, ошондой эле бирөөнүн аялы – тар кудук.

²⁸Бузулган аял каракчыдай болуп буктурмада отуруп алып, эл арасында мыйзамды бузгандарды көбөйтөт.

²⁹Улуган ким? Онтогон ким? Чатакташкан ким? Кайгырган ким? Себепсиз жараат алган ким? Көзү канталап кызарган ким?

³⁰Алар – керээли-кечке шарап ичип отургандар, алар – күчтүү ичимдикти жакшы көргөндөр.

³¹Шараптын кызарганына, чөйчөктө көбүргөнүнө, мелтирегенине караба.

³²Акырында ал сени жыландай, уулуу жыландай чагат.

³³Башка бирөөнүн аялын карайсың, жүрөгүң бузуктукту сүйлөй баштайт.

³⁴Ошондо деңиздин ортосунда, кеменин үстүндө уктап жаткан адамдай болосуң.

³⁵Ошондо сен: «Мени сабашты, бирок эч жерим ооруган жок, мени түрткүлөштү, бирок эч нерсе сезген жокмун. Ойгонгондон кийин кайра ошону эле издейм», – деп айтасың.