Read Кыргыз тилиндеги Библия, 2004 Накыл 24 Bible Online

Накыл 24 - Кыргыз тилиндеги Библия, 2004 bible

Накыл 24

¹Жаман адамдарга көз артпа, алар менен чогуу болууну каалаба.

²Анткени алардын жүрөгү зордук-зомбулук жөнүндө ойлойт, тили жамандык жөнүндө сүйлөйт.

³Yй акылмандык менен курулат, акыл менен бекемделет.

⁴Yй ичи ар кандай кымбат баалуу, сонун мүлккө билгичтик менен толтурулат.

⁵Акылдуу адам күчтүү, даанышман адам өзүнүн күч-кубатын чыңдайт.

⁶Ошондуктан согушту ойлонуп жүргүз. Көп кеңеш ийгиликке жеткирет.

⁷Акылмандык акылсыз адам үчүн өтө бийик, дарбаза алдында ал ооз ачпайт.

⁸Жамандык кылууну ойлогон адамды кара ниет дешет.

⁹Акылсыз адамдын ою – күнөө, шылдыңчыл адам адамдар үчүн жийиркеничтүү.

¹⁰Эгерде сен башыңа мүшкүл түшкөн күнү алсыз экениңди сезсең, анда күчүң аз.

¹¹Өлүмгө кыйылгандарды куткар. Өлүмгө өкүм кылынгандарды куткаруудан кантип баш тартасың?

¹²Сен: «Мына, биз муну билген эмес элек», – дегени турасыңбы? Эмне, жүрөктөрдү Сыноочу билбейт бекен? Сенин жүрөгүңдү Байкап Туруучу муну билет, Ал адамга кылган ишине жараша тиешесин берет.

¹³Уулум, бал же, анткени ал жагымдуу, даамы таңдайыңан кетпеген балды да же.

¹⁴Акылмандыкты таанып билүү да сенин жаныңа дал ошондой жагымдуу. Эгерде аны тапкан болсоң, анда келечегиң бар, үмүтүң ишке ашат.

¹⁵Мыйзамсыз, адил адамдын үйүнө жамандык ойлобо, анын жаткан жайын талап-тонобо.

¹⁶Анткени адил адам жети жолу жыгылат, бирок кайра турат, ал эми мыйзамсыздар жыгылып, өлүмгө дуушар болушат.

¹⁷Душманың кулаганда сүйүнбө, ал мүдүрүлгөндө жүрөгүң кубанбасын.

¹⁸Анткени муну Теңир көрөт, бул Ага жакпайт, Ал Өзүнүн ага болгон каарын токтотуп коёт.

¹⁹Жамандык кылгандарга ачууланба, мыйзамсыздарга көз артпа.

²⁰Анткени жамандык кылгандардын келечеги жок, мыйзамсыздардын чырагы өчөт.

²¹Уулум, Теңирден жана падышадан корк, козголоңчулар менен байланышпа.

²²Анткени Теңир менен падышадан өлүм күтүлбөгөн жерден келет, экөөнөн келе турган кыйроону ким алдын ала айта алат?

²³Акылмандар да: «Сотто бет карамалык кылуу жакшы эмес», – деп айтышкан эмеспи.

²⁴Күнөөкөргө: «Сеники туура», – деген адамды эл каргайт, аны уруулар жек көрөт.

²⁵Ал эми айыпты ашкерелегендерди эл жакшы көрөт, алар бата алышат.

²⁶Туура жооп ооздон өпкөндөй.

²⁷Адегенде үйүңдөн сырткаркы иштерди жаса, талаадагы иштериңди бүтүр, анан үйүңдү кур.

²⁸Жакыныңа жалган күбө болбо. Жалган сүйлөп эмне кыласың?

²⁹«Ал мага кандай кылса, мен да ага ошондой кылам, ага кылганына жараша тиешесин берем», – дебе.

³⁰Мен жалкоо кишинин талаасынын жанынан, кем акыл кишинин жүзүмзарынын жанынан өттүм.

³¹Баарын тикенек басып кетиптир, аны чалкан каптап калыптыр, таш дубалы урап калыптыр.

³²Муну көрүп, жүрөгүмдү өзгөрттүм, муну көрүп, өзүмө сабак алдым:

³³«Бир аз уктай турсаң, бир аз үргүлөп жата турсаң, бир аз колуңду бооруңа алып жата турсаң,

³⁴жакырлык сага жолоочудай кирип келет, муктаждык сага куралдуу кишидей кирип келет».