Read Кыргыз тилиндеги Библия, 2004 Накыл 25 Bible Online

Накыл 25 - Кыргыз тилиндеги Библия, 2004 bible

Накыл 25

¹Булар да Жүйүт падышасы Хискиянын кишилери жыйнаган Сулаймандын накыл сөздөрү.

²Кудайдын даңкы – ишти жашыруун кармоо, ал эми падышалардын даңкы – ишти изилдөө.

³Асмандын бийиктиги, жердин тереңдиги жана падышалардын жүрөгү изилденгис.

⁴Күмүштөн кошундуну ажырат, ошондо зергердин колунан идиш чыгат.

⁵Падышадан адилетсиз адамды алыс кыл, ошондо анын тагы чындык менен бекемделет.

⁶Падышалардын алдында өзүңдү жогору көтөрбө, улуу адамдардын ордуна турба.

⁷Анткени сени көзүң көргөн атактуу адамдардын алдында кемсинтишкенден көрө, сага: «Кел бул жерге, жогору өт», – деп айтышканы жакшы.

⁸Талашып-тартышканга шашпа, атаандашың маскара кылса эмне болот?

⁹Атаандашың менен талашып-тартыш, бирок уккан адам сени жемелебеши үчүн,

¹⁰бирөөнүн жашыруун сырларын ачпа, болбосо өмүр бою маскара болуп өтөсүң.

¹¹Орундуу сөз – жаркыраган күмүш идиштеги алтын алма.

¹²Акылдуу ашкерелөөчү – көңүл коюп уккан кулак үчүн алтын сөйкө жана таза алтындан жасалган жасалга.

¹³Оруу-жыюу маалында кар кошулган ичимдик кандай болсо, ишенимдүү элчи аны жиберген адам үчүн ошондой. Ал мырзасынын жүрөгүн кубантат.

¹⁴Жалган белек менен мактанган адам жамгыры жок булут менен шамалдай.

¹⁵Момундук төрөнү ырайым кылууга түртөт, жумшак тил сөөктү сындырат.

¹⁶Сен бал таап алдыңбы? Канча керек болсо, ошончо же, ашыра тоюп алсаң, кусасың.

¹⁷Досуңдун үйүнө кайра-кайра эле бара бербе, болбосо ал сенден жадап, сени жек көрүп калат.

¹⁸Жакынына каршы жалган күбөгө өтүп, жалаа жапкан киши балкадай, кылычтай, курч жебедей.

¹⁹Башка мүшкүл түшкөн күнү ишенимсиз адамга таянуу сынган тишке, алсыз бутка таянууга барабар.

²⁰Кайгылуу жүрөккө ырдоо суук күнү бирөөнүн чапанын чечип алганга, жарасына уксус куйганга барабар.

²¹Душманың ачка болсо, нанга тойгуз, суусап турса, суусунун кандыр.

²²Анткени ушундай кылуу менен сен анын башына чок үйөсүң. Ошондо Теңир сага тиешеңди берет.

²³Түндүктөн соккон шамал жамгыр жаадырат, ал эми ушакчынын сөзү нааразы жүздөрдү туудурат.

²⁴Ажаан аял менен заңгыраган үйдө жашаганча, үйдүн чатырынын бир бурчунда жашаган жакшы.

²⁵Алыскы өлкөдөн келген жакшы кабар суусап алсыраган жанга муздак суу ичиргенге барабар.

²⁶Мыйзамсыздын алдында адил адамдын жыгылышы – булактын ылайланганындай, кудуктун бузулганындай.

²⁷Балды көп жеген жакшы эмес, ошол сыяктуу эле сая кууп жеткен атак-даңк – атак-даңк эмес.

²⁸Өз рухун башкара албаган адам талкаланган, чепсиз шаарга окшош.